හමාස් සංවිධානය විසින් ගාසා තීරයේ රඳවාගෙන සිටි ප්‍රාණ ඇපකරුවන් හයදෙනෙකුගේ සිරුරු තම හමුදාව විසින් සොයාගෙන ඇති බව ඊශ්‍රායලය පවසනවා.
නිවේදනයක් නිකුත් කරමින් ඊශ්‍රායල ආරක්ෂක හමුදාව කියා සිටියේ මෙම මළ සිරුරු සෙනසුරාදා (31) රෆා ප්‍රදේශයේ භූගත උමගක තිබී සොයාගත් බවයි.
මේ වනවිට එම මළ සිරුරු ඊශ්‍රායල භූමියට ගෙනවිත් ඇති බව ඊශ්‍රායල ආරක්ෂක අංශ සඳහන් කළා.
මෙලෙස ඝාතනය කළ හයදෙනා අතර කාන්තාවන් දෙදෙනෙක් ද වන බවයි විදෙස් වාර්තා පැවසුවේ.
හර්ෂ් ගෝල්ඩ්බර්ග්, අල්මොග් සරුසි, ඇලෙක්ස් ලුබ්නොව්, ඔරි ඩැනිනෝ,ඊඩන් යෙරුෂල්මි සහ කර්මෙල් ගැට් යන අය ප්‍රාණ ඇපකරුවන් ලෙස රඳවා සිටිය දී හමාස් සංවිධානය මෙලෙස ඝාතනය කර තිබෙනවා.
මේ අතර මෙම හයදෙනා අතර සිටින 23 හැවිරිදි හර්ෂ් ගෝල්ඩ්බර්ග් නැමැත්තා එක්සත් ජනපද පුරවැසියෙකු බවට හඳුනාගෙන තිබෙනවා.
2023 ඔක්තෝබර් 07 වන දින හමාස් සංවිධානය ඊශ්‍රායලට එල්ල කළ ප්‍රහාරයේ දී මොවුන් සියලු දෙනා ප්‍රාණ ඇපකරුවන් ලෙස ගාසා තීරයට රැගෙන ගොස් තිබුණා.
