හඳුනා නොගත් උණ රෝගී තත්ත්වයකට ගොඳුරුවීමෙන් වයස අවුරුදු 13ක දරුවෙක් මීගමුව රෝහලට ඇතුළත් කිරීමෙන් පසු අද (06) මියගොස් තිබෙනවා.
මෙලෙස මියගොස් ඇත්තේ අබ්දුල් අසීස් නැමැති 08 ශ්‍රේණියේ ඉගෙනුම ලැබූ දරුවෙක්.
“මගේ පුතාගෙ වයස අවුරුදු 13යි. එයා අබ්දුල් අසීස්, එයාට මීට දින දෙකකට පමණ පෙර ඔලුවෙ කැක්කුමක් එක්ක උණ රෝගී තත්වයක් ඇති වුණා. උණ වරින් වර අඩු වුණා, වැඩි වුණා. පස්සෙ පෙරේදා රාත්‍රී මගේ පුතා තද නින්දකට වැටුණා. මේක අසාමාන්‍ය තත්ත්වය නිසා ඊයේ (05) රාත්‍රී 10.30ට විතර මීගමුව මහ රෝහලට අපි පුතාව ඇතුළත් කළා. එහිදී පුතාව දැඩි සත්කාර ඒකකයට යොමු කළා. ඒකේ වෛද්‍යවරුන් ලොකු උත්සාහයක් ගත්තා. පුතා රාත්‍රී ගත් ආහාර පවා එළියට ගත්තා. නමුත් පුතාට හුස්ම ගැනීමේ අපහසුතාවයක් තිබුණා. අද (06) අලුයම 12.20ට මගේ පුතා මිය ගියා.” යනුවෙන් දරුවාගේ පියා අදහස් දක්වමින් සඳහන් කළා.
දරුවාගේ මළසිරුර මීගමුව මහ රෝහලේ මතෘ ශරීරාගාරයේ තබා ඇති අතර, මීගමුව රෝහල් පොලිසිය මේ පිළිබඳව ඉදිරි විමර්ශන කටයුතු සිදුකරනවා.
