කොටදෙනියාව පොලිස් වසමේ මැල්ලවගෙදර ප්‍රදේශයේ තාප්පවලින් වට වූ සුවිසල් දෙමහල් නිවසක හොර රහසේ පවත්වාගෙන ගිය කසිප්පු ස්කාගාරයක් වටලා පුද්ගලයින් තිදෙනෙකු සමග රුපියල් ලක්ෂ පනහක් පමණ වටිනා දේපළ අත්අඩංගුවට ගත් බව කොටදෙනියාව පොලිසිය පවසනවා.
අප ප්‍රාදේශීය වාර්තාකරු පැවසුවේ; පොලිසියට ලද තොරතුරක් මත ඊයේ (25) සවස සිදු කළ සෝදිසි මෙහෙයුමකදී ගෝඩා බැරල් පනහක්, පෙරන ලද කසිප්පු ස්ප්‍රීතු බෝතල් 45 බැගින් අඩංගු වූ කෑන් 12ක්, සීනි මිටි 10ක්, ඊස්ට් පැකට් 04ක්, ගෑස් සිලින්ඩර් 09ක් සමග පෙරීමේ උපකරණ රැසක් පොලිස් අත් අඩංගුවට ගැනුණා.
දැවැන්ත දෙමහල් නිවසක් දිනකට රුපියල් 5000 බැගින් වූ කුලී පදනම මත ලබාගෙන මෙම ජාවාරම මසකට වැඩි කලක් සිදු කර ඇතැයි මූලික පොලිස් පරීක්ෂණයේ දී හෙළි ව තිබෙනවා.
බිම් මහලේ සාලය ඇතුළු කාමර යොදාගෙන කසිප්පු පෙරීම සිදුකර ඇති අතර නිවස හිමිකරු හා ඔහුගේ භාර්‍යාව ඉහළ මාලයේ ජීවත් ව ඇති බවයි පැවසෙන්නේ.
නිවස හිමිකරු රෝගී තත්ත්වයකින් පෙළෙන පුද්ගලයෙක් බව ද අනාවරණය ව තිබෙනවා.
අත්අඩංගුවට ගත් සැකකරුවන් ගනේගොඩ, මැල්ලවගෙදර, හලාවත පෙදෙස්වල පදිංචිකරුවන්.
මෙම ජාවාරම පවත්වාගෙන ගිය ප්‍රධාන සැකකරු ගනේගොඩ පදිංචිකරුවකු බව ද ඔහු මීරිගම ප්‍රදේශයේ ආන්දෝලනාත්මක සිද්ධීන්වලට සම්බන්ධ ප්‍රධාන පෙළේ කසිප්පු ජාවාරම්කරුවකුගේ සමීප හිතවතෙකු බව ද කොටදෙනියාව පොලිසිය පවසනවා.
මීගමුව කොට්ඨාස භාර ජ්‍යේෂ්ඨ පොලිස් අධිකාරි එරික් පෙරේරාගේ උපදෙස් හා සහකාර පොලිස් අධිකාරි සෙනරත් එදිරිසිංහගේ මෙහෙයුම යටතේ මෙම මෙහෙයුම සිදු කර ඇත්තේ.
