සවලකින් පහර දී සිය මිතුරා ඝාතනය කළ පුද්ගලයෙකු අද (10) අලුයම අත්අඩංගුවට ගත් බව වවුනියාව – ඊච්චන්කුලම පොලිසිය සඳහන් කරනවා.
මිතුරන් දෙදෙනෙකු පැවැත් වූ මත්පැන් සාදයක් අතර තුර ඇති වූ බහින් බස්වීමක් දුරදිග ගොස් එක් පුද්ගලයෙකු විසින් අනෙක් පුද්ගලයා මෙලෙස ඝාතනය කර ඇති බවටයි තොරතුරු වාර්තා වුණේ.
පහරකෑමෙන් බරපතළ තුවාල ලැබූ පුද්ගලයා වවුනියාව රෝහල වෙත ඇතුළත් කිරීමෙන් පසු මියගොස් තිබෙනවා.
ඝාතනයට ලක්වූ පුද්ගලයා වවුනියාව, කල්මඩු, ඊශ්වරිපුරම් ප්‍රදේශයේ පදිංචිව සිටි 32 හැවිරිදි පුද්ගලයෙක්.
අපරාධය සිදුකළ සැකකරු ප්‍රදේශයෙන් පළාගොස් සැඟව සිට ඇති අතර, අද (10) අලුයම මෙම සැකකරු පොලිසියට පැමිණ සිදුකළ අපරාධය පාපොච්චාරණය කර භාර වී තිබෙනවා.
එලෙස භාරවීමෙන් අනතුරුවයි සැකකරු අත්අඩංගුවට ගෙන ඇත්තේ.
අත්අඩංගුවට ගැනුණු සැකකරු වවුනියාව මහේස්ත්‍රාත් අධිකරණයට ඉදිරිපත් කිරීමට නියමිතව තිබුණා.
