කාන්තාවක් ගස් බැඳ, එම කාන්තාවට පහරදීමේ සිදුවීමක් හලාවත – බංගදෙණිය ප්‍රදේශයෙන් වාර්තා වනවා.
දසත ප්‍රාදේශීය වාර්තාකරු පැවසුවේ, මෙලෙස පහර දී ඇත්තේ එම ප්‍රදේශයේ විවිධ සේවා සමූපකාරයේ රාජකාරී සිදු කරන පිරිසක් බවයි.
සීමාසහිත හලාවත විවිධ සේවා සමුපකාර සමිතියට අයත් බංගදෙණිය ප්‍රාදේශිකය ආසන්නයේ දී මෙම පහර දීම සිදු ව තිබෙනවා.
පහර කෑමට ලක්ව ඇත්තේ තිදරු මවක්.
ඇය මේ වන විට ප්‍රතිකාර සඳහා හලාවත මහා රෝහලට ඇතුළත් කර තිබෙනවා.
පහර කෑමට ලක්ව ඇති කාන්තාව වසර ගණනාවක සිට බංගදෙණිය මංසන්ධියේ ඇති පෞද්ගලික ගොඩනැගිල්ලක් පිටුපස මුළුතැන් ගෙයක් සාදා ගෙන සුළු ව්‍යාපාරික කටයුත්තක් කර ගෙන ගොස් ඇති බවත්, එම ගොඩනැගිල්ල මෑතක දී හලාවත විවිධ සේවා සමුපකාර සමිතිය විසින් මිල දී ගෙන ඇති බවත් ප්‍රදේශවාසීන් පවසනවා.
පසුව සමුපකාරය විසින් ගොඩනැගිල්ල සහිත ඉඩම මිල දී ගත්ත ද ඇය එම ස්ථානයෙන් ඉවත්ව ගොස් නොමැති බවයි වාර්තා වන්නේ.
ඒ පිළිබඳ ව ඇති වූ කතාබහකින් පසුව හලාවත විවිධ සේවා සමුපකාර සමිතියේ සාමාන්‍යාධිකාරීවරිය සහ තවත් සේවිකාවන් පිරිසක් එම ස්ථානයට ගොස් අදාළ කාන්තාව කණුවක බැඳ පහරදීම සිදු කර ඇති බවයි දසත ප්‍රාදේශීය වාර්තාකරු පැවසුවේ.
හලාවත විවිධ සේවා සමුපකාර සමිතියේ සභාපති සරත් විජේසිංහ මහතාගෙන් දසත ප්‍රාදේශීය වාර්තාකරු මේ සම්බන්ධයෙන් විමසූ විට කියා සිටියේ එම කාන්තාව තම සමුපකාර සමිතියට අයත් භූමියක් බලහත්කාරයෙන් අත්පත් කර ගැනීමට යන බවත්, පහරදීමක් සිදු වී නොමැති බවයි.
කෙසේවෙතත් මෙම සිදුවීම සම්බන්ධයෙන් අප හලාවත පොලිස් ස්ථානාධිපතිවරයාගෙන් කළ විමසීමක දී ඔහු පැවසුවේ දෙපාර්ශ්වය අතර ම පහරදීමක් හටගෙන ඇති බවත්, මෙම සිදුවීම සම්බන්ධයෙන් විවිධ සේවා සමුපකාරයෙන් පැමිණිල්ලක් ද සිදු කර තිබෙන බවයි.
නමුත් පහර කෑමට ලක් වූ කාන්තාව රෝහල්ගත කෙරුණ ද, එම පාර්ශ්වයෙන් මෙතෙක් කිසිවෙකු පැමිණිල්ලක් සිදු කර නොමැති බව ද වාර්තා වනවා.
