නිවෙසට පැමිණි වයෝවෘද්ධ පියාව ගේට්ටුව අසලින්ම පන්නා දමමින් ඉදලකින් සහ කුඩයකින් අමානුෂික ලෙස පහර දෙමින් බැන වැදෙන ඔහුගේ දියණිය සහ මිනිබිරිය නාරාහේන්පිට පොලිසිය මඟින් අත්අඩංගුවට ගෙන තිබේ. මෙම ක්‍රියාව දැක්වෙන වීඩියෝවක් පසුගිය දින කිහිපය තුළ සමාජ මාධ්‍ය කලඹවමින් සැරිසැරූ අතර ඒ ඔස්සේ නාරාහේන්පිට පොලිසිය මඟින් මීට අදාළ විමර්ශන ආරම්භ කර ඇත.
ඉකුත් 19 වැනි දින මෙම පහරදීම නාරාහේන්පිට, දාබරේ මාවතේදී සිදුව ඇති බවටද ඒ ඔස්සේ සිදුකළ විමර්ශනවලදී හෙළිවූ බව පොලිසිය පවසයි.
වයෝවෘද්ධ පියාට ඔහුගේම දියණිය සහ මිනිබිරිය එලෙස සිදුකළ පහරදීම අසල්වාසියකු විසින් වීඩියෝ කර සමාජ මාධ්‍ය වෙත මුදාහැර තිබිණි.
වයෝවෘද්ධ පියාට ඉදලෙන් පහර දුන් දියණිය එහිදී පවසා තිබුණේ අවශ්‍ය නම් පියාට පොලිසි යන ලෙසටය.
මෙලෙස පියාට තර්ජනය කරමින් පහරදුන් ඔහුගේ දියණිය හා මිනිබිරිය වයෝවෘද්ධ පියාව නිවෙසට නොගෙන ගේට්ටුව අසලින්ම පිටමං කර තිබූ බව පොලිසිය පවසයි.
මෙම වයෝවෘද්ධ පියා ඊට යාබද නිවෙසක ජීවත් වන බවද පොලිසිය කියා සිටී. පියා විසින්ම දුන් ඉඩමක දියණිය පදිංචිව සිටින අතර පෙරේදා (20දා) මේ සම්බන්ධයෙන් දියණිය හා මිනිබිරිය අත්අඩංගුවට ගෙන ඇත.
අනතුරුව ඔවුන් අලුත්කඩේ මහෙස්ත්‍රාත් අධිකරණය හමුවට ඉදිරිපත් කිරීමෙන් අනතුරුව රුපියල් ලක්ෂය බැගින් වූ ශරීර ඇප මත මුදාහැර තිබේ. පහර කෑමට ලක් වූ වයෝවෘද්ධ පියා රෝහල්ගත කර ඇත.
සසැදි පුවත – පිය සෙනෙහසට අමානුෂිකව පහරදුන් පව්කාර දියණිය
චාමර අමරසූරිය
ලිපියේ උපුටා ගැනීම “මව්බිම” පුවත්පතෙන්…
