සමාජ මාධ්‍ය ජාලා ක්‍රියාකරුවෙකු විසින් කරන ලද අසත්‍ය ප්‍රකාශයක් සම්බන්ධයෙන් අපරාධ පරීක්ෂණ දෙපාර්තමේන්තුව විමර්ශනයක් ආරම්භ කර ඇතැයි පොලිසිය පවසනවා.
නිවේදනයක් නිකුත් කරමින් පොලිස් මාධ්‍ය ප්‍රකාශක කාර්යාලය සඳහන් කළේ එක්ස්ප්‍රස් පර්ල් නෞකාවේ නීතිමය කටයුත්තකට අදාළව සැකකරු මෙම අසත්‍ය ප්‍රකාශය සිදු කර ඇති බවයි.
ශ්‍රී ලංකා මුහුදු කලාපය තුළ අනතුරට ලක් වූ එක්ස්ප්‍රස් පර්ල් නෞකාවේ ප්ලාස්ටික් ප්ලේට් මගින් මෙරට සමුද්‍ර කලාපයට සිදු වූ පරිසර හානිය සම්බන්ධව වන්දි මුදල් ලබා ගැනීම සඳහා නඩු පැවරීමේ කාර්යයට උපදෙස් ලබාදීමේදී නීතිපති දෙපාර්තමේන්තුවේ අතිරේක සොලිසිටර් ජනරාල්වරයෙකු හා රජයේ අධි නීතිඥවරියක් විසින් ඔවුන්ගේ පුද්ගලික වාසි සඳහා කටයුතු කර ඇති බවට පවසමින් සැකකාර සමාජ මාධ්‍ය ක්‍රියාකාරිකයා විසින් වීඩියෝවක් ප්‍රකාශයට පත් කර ඇතැයි පොලිසිය සඳහන් කළා.
ඒ අනුව නීතිපති දෙපාර්තමේන්තුව සහ ඉහත නිලධාරීන් සම්බන්ධයෙන් මහජනයා තුළ යම් වෛරී හැගීමක් ඇවිස්සෙන සහ රජයේ සේවකයෙකු වශයෙන් කරනු ලබන නිත්‍යානුකූල නියමයන්ට බාධා වන ආකාරයට අසත්‍ය ප්‍රකාශ සමාජ ජාලා ඔස්සේ පළ කිරීම සම්බන්ධයෙන් විමර්ශනයක් සිදු කරන ලෙසට ඉල්ලමින් එම ජ්‍යෙෂ්ඨ නිලධාරියා සහ නිලධාරිනිය අපරාධ පරීක්ෂන දෙපාර්තමේන්තුව වෙත පැමිණිල්ලක් ඉදිරිපත් කර තිබෙනවා.
ඒ අනුවයි එම දෙපාර්තමේන්තුව මගින් මේ පිළිබඳ විමර්ශනයක් ආරම්භ කර ඇත්තේ.
