සද්දන්තයාට බිලි වූ මහලු කත

වනඅලි පහරදීමකින් වයෝවෘද්ධ කාන්තාවක් එම ස්ථානයේ ම ජීවිතක්ෂයට පත්වීමේ පුවතක් වාර්තා වනවා.

මෙම ඛේදවාචකය වාර්තා වන්නේ එප්පාවල – කටියාව යාය 10 ප්‍රදේශයෙන්.

අද (12) අලුයම මෙම වන අලි ප්‍රහාරය එල්ල වී ඇති බවත්; 84 හැවිරිදි වියෙහි පසුවූ කාන්තාව එම ස්ථානයේදීම ජීවිතක්ෂයට පත්ව ඇති බවත් පැවසෙනවා.

මෙලෙස මිය ගොස් ඇත්තේ කටියාව, යාය 10, ප්‍රියංකරගම ප්‍රදේශයේ පදිංචිව සිටි රත්නායක මුදියන්සේලාගේ කරුණාවති නමැති කාන්තාවක්.

අලුයම් කාලයේ දී මරණකාරිය කිසියම් අවශ්‍යතාවකට නිවසින් එළියට බැස ගෙමිදුලට පැමිණි අවස්ථාවේ දී වන අලියා පහර දී ඇති බවයි පැවසෙන්නේ.

අලියාගේ පහරදීමෙන් ඇයගේ ශරීරයට බරපතළ හානි සිදුව තිබෙනවා.

සිද්ධිය සම්බන්ධයෙන් ප්‍රියංකරගම පොලිස් ස්ථානය වැඩිදුර විමර්ශන සිදු කරනවා.