බුත්තල – කතරගම මාර්ගයේ දී සංචාරකයින් පිරිසක් රැගත් බස් රථයකට වනඅලි ප්‍රහාරයක් එල්ල වී තිබෙනවා.
බුත්තල සිට කතරගම දක්වා යාල ජාතික වනෝද්‍යානය මැදින් දිවෙන මාර්ග කොටසේ දියි මෙම ප්‍රහාරය එල්ල වී ඇත්තේ.
වන අලියා මාර්ගය හරස් කරමින් බස් රථයේ ඉදිරියට පැමිණ පැති වීදුරුව කඩා බිඳ දමා තිබෙනවා.
වනඅලියාගේ ප්‍රහාරයෙන් කිසිවෙකුටත් ජීවිත හානි හෝ තුවාල සිදු නොවුණ ද රථයට නම් දැඩි අලාභ හානි සිදු ව ඇති බවයි දසත ප්‍රාදේශීය වාර්තාකරු පැවසුවේ.
ඇතැම් සංචාරකයින් මෙම මාර්ගයේ දී වනඅලින්ට ආහාර ද්‍රව්‍ය ලබා දීමට හුරුවීම හේතුවෙන් මෙලෙස බොහෝ අවස්ථාවල දී වනඅලි මාර්ගය හරස් කරමින් කෑම බීම ඉල්ලීමට පුරුදු වී සිටිනවා.
කෑම බීම ලබා නොදුන්නහොත් මාර්ගයේ යන රථවලට පහර දීම සිදු වන බැවින් වනඅලින් හට ආහාර ලබා නොදෙන ලෙසත්, ඔවුන් සමීපයට ම ගොස් ඡායාරූප නො ගන්නා ලෙසටත් වනජීවී නිලධාරීන් සංචාරකයින්ට සේම රියදුරන්ට අවවාද කර ඇති බවයි වාර්තා වන්නේ.
