20-20 ලෝක කුසලාන ක්‍රිකට් තරගාවලියේ දකුණු අප්‍රිකාව සහ ශ්‍රී ලංකාව අතර පැවති තරගය දකුණු අප්‍රිකාව කඩුලු 06කින් ජයගත්තා.
ඒ, අනුව ශ්‍රී ලංකාවට සිදුවුණේ දරුණු පාරජයකින් මෙවර ලෝක කුසලාන ගමන ආරම්භ කිරීමටයි.
මෙම තරගයේ දී පිතිකරුවන්ට පන්දු යවන්නන්ගෙන් දැඩි තර්ජනයක් එල්ලවන ආකාරය දැකගත හැකි වුණා.
තත්ත්වය ඒසේ තිබිය දී මෙම තරගය අවසන් වුණේ තවත් වාර්තාවක් ලෝක කුසලාන වාර්තා අතරට එක්කරමින්.
ඒ, ලෝක කුසලාන විස්සයි විස්ස තරගයක වැඩිම නිලකුණු පන්දු (ඩොට් බෝල්) සංඛ්‍යාවක් වාර්තා වූ තරගය ලෙසයි.
මෙම තරගයේ දී වාර්තා වූ නිලකුණු පන්දු ගණන 126ක් ලෙස සටහන්ව තිබුණා.
එහිදී ශ්‍රී ලංකා ඉනිමෙන් නිලකුණු පන්දු 74ක් සහ දකුණු අප්‍රිකානු පිළිතුරු ඉනිමෙන් නිලකුණු පන්දු 52ක් වාර්තා වුණා.
දෙරට අතර මෙම තරගය පැවැත් වුණේ ඇමරිකාවේ නිව්යෝර්ක් හි නසාවු ජාත්‍යන්තර ක්‍රිකට් ක්‍රීඩාංගණයේ දීයි.
මේ අතර මෙම ක්‍රිකට් ක්‍රීඩාංගණයේ පැවති පළමු ජාත්‍යන්තර ක්‍රිකට් තරගය මෙය වීම ද විශේෂත්වයක්.
