දෙවන දකුණු ආසියානු සැම්බෝ (Sambo) සටන් කලා ශූරතා තරගාවලියේ දී ශ්‍රී ලංකාව නියෝජනය කළ 08 දෙනෙකුගෙන් සමන්විත කණ්ඩායම රන් පදක්කම් 04 ක්, රිදී පදක්කම් 03 ක් සහ ලෝකඩ පදක්කම් 02 ක් දිනා ගෙන සමස්ත තරගාවලියේ තෙවන ස්ථානයට පත් වෙමින් අද පස්වරුවේ කටුනායක ගුවන් තොටුපොළ වෙත පැමිණියා.
මෙම තරගාවලිය නොවැම්බර් 01 වැනි දින සිට 05 වැනි දින දක්වා බංග්ලාදේශයේ ඩකා නුවර බංගබන්දු ගෘහස්ථ ක්‍රීඩාංගණයේදියි පැවැත්වුණේ.
මෙම ජයග්‍රහණයත් සමග ශ්‍රී ලංකා සැම්බෝ කණ්ඩායම ආසියානු තරගාවලියට සහභාගී වීම සඳහා සුදුසුකම් ලබා ගත්තා.
ජයග්‍රාහී කණ්ඩායම අද පස්වරු 03.25 ට ඉන්දියාවේ චෙන්නායි සිට ෆිට්ස් එයාර් ගුවන් සේවයේ 8D-834 දරන ගුවන් යානයෙන් කටුනායක ගුවන් තොටුපොළ වෙත පැමිණි බවයි අප ගුවන්තොටුපොළ වාර්තාකරු පැවසුවේ.
මොවුන් පිළිගැනීම සඳහා ශ්‍රී ලංකා සැම්බෝ ෆෙඩරේෂනයේ නිලධාරීන් සහ මෙම ක්‍රීඩකයින්ගේ දෙමාපියන් පිරිසක් කටුනායක ගුවන් තොටුපොළ පැමිණීමේ පර්යන්තය වෙත එක් ව සිටියා.
