ශ්රී ලංකා දුම්රිය දෙපාර්තමේන්තුවට ඉන්දියානු රජය මඟින් ලබාදෙන ඩීසල් දුම්රිය එන්ජින් 22ක් ලබාගැනීම වෙනුවෙන් වන ගිවිසුමට අත්සන් තබා ඒවා පිළිගැනීමට අමාත්ය මණ්ඩලය අනුමැතිය ලබා දී තිබෙනවා.
සුළු වශයෙන් භාවිතා කරන ලද M10 දුම්රිය එන්ජින් මාදිලියේ වැඩිදියුණු කළ එන්ජින් 20ක් සහ එම එන්ජින් නඩත්තුවට අවශ්ය අමතර කොටස් ලබා ගැනීම පිණිස අතිරේක දුම්රිය එන්ජින් 02ක් ප්රදානයක් ලෙස මෙලෙස ශ්රී ලංකාවට ලබාදීමට නියමිතයි.
එම දුම්රිය එන්ජින් නඩත්තු කිරීමේ සේවාව වසර 05ක කාලයකට ලබාදීම සඳහා වන නොකැඳවූ යෝජනාවක් ඉන්දියාවේ ඉංජිනේරු උපදේශක සහ යටිතල පහසුකම් සංවර්ධන සමාගමක් වන RITES සමාගම විසින් ඉදිරිපත් කර තිබෙනවා.
මේ අතර ප්රදානයක් වශයෙන් ලබා දෙන අදාළ දුම්රිය එන්ජින් නඩත්තු කිරීමේ හැකියාව ශ්රී ලංකා දුම්රිය දෙපාර්තමේන්තුව සතුව පවතින බවත්, දෙපාර්තමේන්තුවේ කාර්යමණ්ඩලය මඟින් එම කාර්ය ඉටුකරවා ගැනීම යෝග්ය බවත් 2024-06-11 වන දින අමාත්ය මණ්ඩලය විසින් පත් කරන ලද සාකච්ඡා සම්මුති කමිටුවක් සහ ව්යාපෘති කමිටුව මඟින් නිර්දේශ කර ඇති බව සඳහන්.
එම ව්යාපෘති කමිටුව නිර්දේශ මතයි අදාළ දුම්රිය එන්ජින් මෙරටට ලබාගැනීම සඳහා අනුමැතිය අමාත්ය මණ්ඩලය විසින් ලබා දී ඇත්තේ.
