කොට්ටාව සහ තලවතුගොඩ අවට වීදි ආහාර අලෙවි කරන ස්ථාන 14කට එරෙහිව නඩු පවරා තවත් ස්ථාන 6කට අවවාද කර නිවේදන ලබාදී තිබෙනවා.
මහරගම මහජන සෞඛ්‍ය පරීක්ෂක නිලධාරීන් විසිනුයි ඊයේ (02) රාත්‍රී අදාළ වීදි ආහාර අලෙවි කරන ස්ථානවල හදිසි වැටලීමක් සිදුකර ඇත්තේ.
එහිදී මිනිස් පරිභෝජනයට නුසුදුසු ආකාරයෙන් සෞඛ්‍ය ආරක්ෂිත නොවන ආකාරයට ආහාර අලෙවි කළ ස්ථාන 14ක් සම්බන්ධයෙන් කඩුවෙල මහේස්ත්‍රාත් අධිකරණය හමුවේ නඩු පැවරීමට කටයුතු කර ඇති අතර තවත් ස්ථාන 6කට නිවේදන නිකුත් කර තිබෙනවා.
කිඹුලාවල සහ තලවතුගොඩ ස්ට්‍රීට් ෆුඩ් (Street Food) ඇතුලු ආපන ශාලා 55ක් මෙහිදී පරීක්ෂාවට ලක් කෙරුණු බව සඳහන්.
පිටිවලින් සකස් කෙරණු ආහාර වර්ග, මස් මාලු කෑම ඇතුළු වෙනත් කෑම වර්ග විවෘතව මේස මත ප්‍රදර්ශනය කර අලෙවි කිරීම නිසා එම ආහාරවලට දූවිලි සහ වාහනවලින් පිටවන දුමාරය සෘජුවම වැදීම තුළින් දූෂණයට ලක්ව ඇති බවටයි හෙළිවී ඇත්තේ.
ඊට අමතරව පිසූ ආහාර අමු ආහාර සමඟ එකට තැබීම, මලකඩ ඇති උපකරණවල මස් බැදීම සහ මස් බැදීම සඳහා දින ගණනක් පැරණි අධික ලෙස කළු වූ තෙල් භාවිතා කර ඇති බව ද සඳහන්.
කොත්තු, රයිස්, නූඩ්ලස් වැනි ආහාර පරිසරයට නිරාවරණය වෙමින් ප්‍රදර්ශනය කර තැබෙන අතර ඒවාට ද දැඩි ලෙස දූවිලි වැදී තිබියදී මහජන සෞඛ්‍ය පරීක්ෂකවරුන් විසින් සොයා ගනු ලැබුවා.
ඊට අමතරව ආහාර සකස් කරන මෙන්ම අලෙවි කරන සේවකයන් අත් ආවරණ, මුව ආවරණ, හිස්වැසුම් හා ඒප්‍රන් පැළඳ නොසිටීම, වෙළඳසැල්වලින් බැහැර කෙරෙන අප ජලය පොදු කාණුවට බැහැර කිරීම, කසල බඳුන් විවෘතව තැබීම ද වීදි ආහාර අලෙවිකරුවන්ට එල්ලවූ චෝදනා වනවා.
කොට්ටාව ප්‍රදේශයෙන් මිනිස් පරිභෝජනයට නුසුදුසු කුකුල් මස් කිලෝ 12ක් සහ කෘමීන් සිටි රසකාරක යුෂ බෝතල් විනාශ කිරීමට ද පියවර ගැනුණා.
ඒ අනුව අදාළ වැරදි සම්බන්ධයෙන් වීදි ආපන ශාලා 14කට කඩුවෙල අධිකරණයේ නඩු පවරා ස්ථාන හයකුට නිවේදන නිකුත් කිරීමටයි මහජන සෞඛ්‍ය පරීක්ෂකවරුන් පියවර ගෙන ඇත්තේ.
