රුපියල් හත් ලක්ෂ හැත්තෑ පන් දහසක් වටිනා විසිතුරු පැළ තොගයක් නීතිවිරෝධී ලෙස මෙරටට රැගෙන විත්, ඒවා කටුනායක ගුවන් තොටුපොළ පැමිණීමේ පර්යන්තයේ කිසිවක් ප්රකාශ කිරීමට නොමැති ” හරිත මාවත ” ( Green Channel ) ඔස්සේ පිට කර ගෙන යාමට තැත් කළ ශ්රී ලාංකික ගුවන් මගියෙක් අද (11) අලුයම ගුවන් තොටුපොළ රේගු නිලධාරීන් පිරිසක් විසින් අත් අඩංගුවට ගෙන තිබෙනවා.
මොහු වේයන්ගොඩ ප්රදේශයේ පදිංචි 40 හැවිරිදි ව්යාපාරිකයෙක්.
සැකකරු අද (11) දින අලුයම 12.45 ට ඉන්දියාවේ බැංගලෝර් නුවර සිට, ඉන්ඩිගෝ ගුවන් සේවයේ 6 ඊ.- 1183 දරන ගුවන් යානයෙන් කටුනායක ගුවන් තොටුපොළ වෙත පැමිණ තිබෙනවා.
ඔහු විසින් රැගෙන ආ ගමන් මලු තුළ, මෙම විසිතුරු පැළ 229 සගවා ගෙන තිබූ අතර, එය ශ්රී ලංකාවේ වනජීවී සහ වෘක්ෂලතා ආඥා පනත මෙන්ම ශාක නීරෝධායන පනත යටතේ පවතින වගන්ති උල්ලංඝනය කරමින්, නිසි අවසරයකින් තොරව මෙරටට රැගෙන විත් තිබුණා.
මේ පිළිබද විධිමත් රේගු පරීක්ෂණයක් පවත්වා, මෙම විසිතුරු පැළ තොගය රාජසන්තක කර මොහුට රුපියල් ලක්ෂයක දඩ මුදලක් ගෙවන ලෙසද නියෝග කර තිබෙනවා.
