පසුගිය සතියේ දකුණු චීන මුහුදේ දී තම නාවික හමුදාවට එරෙහිව චීනයේ “නීති විරෝධී ක්‍රියාමාර්ගයට” විරෝධය දැක්වීමට වඩා වැඩි යමක් පිලිපීනය කළ යුතු බව ජනාධිපති ෆර්ඩිනන්ඩ් මාකෝස් පවසනවා.
චීන වෙරළාරක්ෂක බළකාය විසින් එල්ල කළ ප්‍රහාරයකින් පිලිපීන සෙබලෙක් තුවාල ලැබූ අතර, එම ක්‍රියාවන් නීත්‍යානුකූල බව පවසමින් චීනය අදහස් පළ කිරීම මතභේදයට තුඩු දී තිබෙනවා.
“අපි විරෝධතා සියයකට අධික ප්‍රමාණයක් ගොනු කර ඇත, අපිට ඊට වඩා දෙයක් කරන්න වෙනවා ,” මාකෝස් මැනිලා හි දී වාර්තාකරුවන්ට පැවසුවා.
සිද්ධියේ දී වෙඩි තැබීමක් සිදුනොවූ අතර, එබැවින් චීන ක්‍රියාව සන්නද්ධ ප්‍රහාරයක් ලෙස සැලකිය නොහැකි බව මාකෝස් වැඩිදුරටත් කියා සිටියා.
කෙසේ වෙතත් මතභේදයට තුඩු දී ඇති දෙවන තෝමස් ෂෝල් හි ස්ථානගත කර ඇති පිලිපීන හමුදාවන්ට නැවත සැපයීම නැවැත්වීමට එය “හිතාමතා කළ ක්‍රියාවක්” ලෙසින් හැඳින්වූවා.
මෙම ප්‍රකාශය පිළිබඳ අදහස් දැක්වීමට රොයිටර්ස් කළ ඉල්ලීමට මැනිලා හි චීන තානාපති කාර්යාලය ප්‍රතිචාර දක්වා තිබුණේ නැහැ.
චීනයේ ක්‍රියාව හෙළා දැක ඇති එක්සත් ජනපදය, ආරක්ෂක ලේකම් ලොයිඩ් ඔස්ටින් සහ ඔහුගේ පිලිපීන සහකරු අතර දුරකථන ඇමතුමකින් පිලිපීනය සඳහා වූ තම කැපවීම යළි තහවුරු කළා.
එම රටවල ජාතික ආරක්ෂක උපදේශකයින් ද චීනයේ “භයානක සහ උත්සන්න කිරීමේ ක්‍රියා” ගැන කතා කළ බව ධවල මන්දිරය පවසනවා.
දකුණු චීන මුහුදේ දී ගුවන් යානා හෝ පොදු යාත්‍රාවලට සන්නද්ධ ප්‍රහාරයකට එරෙහිව පිලිපීනය ආරක්ෂා කිරීම සඳහා එක්සත් ජනපදය දශක හතක් පැරණි අන්‍යෝන්‍ය ආරක්ෂක ගිවිසුමකට බැඳී සිටිනවා.
