අලුත් අවුරුද්ද සමාජ සම්බන්ධතා වැඩිදියුණු වීමටත් පැරණි සිරිත් විරිත් නොනැසී ඉදිරියට පවත්වා ගැනීමටත් එකිනෙකා අතර අන්‍යොන්‍ය විශ්වාසය වැඩිදියුණු වීමටත් ඉවහල් වන බව විපක්ෂ නායක සජිත් ප්‍රේමදාස පවසනවා.
අලුත් අවුරුද්ද වෙනුවෙන් ඔහු නිකුත් කළ සුබපැතුම් පණිවිඩයේ සඳහන් වන්නේ වසර කිහිපයක් මුළුල්ලේ ලක්වාසී ජනතාවට අලුත් අවුරුදු උදා වූයේ අභියෝග රැසක් මධ්‍යයේ වුවත් සමස්ත ජනතාවගේ එකම බලාපොරොත්තුව වන්නේ රටට, ජනතාවට සෞභාග්‍යය හා නීරෝගිමත්භාවය ප්‍රාර්ථනා කිරීම බවයි.
ස්වයංපෝෂිත ආර්ථික රටාවක් පැවති රට මේ වන විට කඳුළු සලන පාරාදීසයක් බවට පත්ව ඇති අතර පවුලේ සියලු දෙනා එක්ව සතුටින් සාමයෙන් සහ සැනසිල්ලෙන් අලුත් අවුරුද්ද සැමරීමේ අවස්ථාව පවා වසර කිහිපයක සිට අහිමි වී ඇතැයි ඔහු පෙන්වා දෙනවා.
අපේ රටේ ජනතාවගේ සාමාන්‍ය ජීවන තත්ත්වයට අසාමාන්‍ය ලෙස අභියෝග පැමිණ ඇති අතර මේ අන්ධකාර සමය නිමා වී, වචනයේ පරිසමාප්ත අර්ථයෙන්ම සෞභාග්‍ය සම්පන්න දීප්තිමත් අනාගතයක් උදෙසා අධිෂ්ඨානශීලීව පෙළ ගැසීමේ ශක්තිය රටේ සමස්ත පුරවැසි පරපුරට ලැබේවායි ප්‍රාර්ථනා කරන බවයි විපක්ෂ නායකවරයා ප්‍රකාශ කළේ.
