විදේශ රැකියා ක්ෂේත්‍රයට අදාළ ව හා විදේශ සේවා නියුක්ති කාර්යාංශයේ සේවාවන්ට අදාළව මෙතෙක් නොවිසඳුණු ගැටලු සෘජුවම ශ්‍රී ලංකා විදේශ සේවා නියුක්ති කාර්යාංශයේ සභාපතිවරයාට ඉදිරිපත් කිරීමට අවස්ථාව මහජනතාවට ලබාදීමේ විශේෂ වැඩසටහනල් හඳුන්වා දී තිබෙනවා.
“සභාපතිට කියන්න – Talk to Chairman” නම් මෙම වැඩසටහන මගින් අදාළ ගැටලු සෘජුවම සභාපතිවරයා වෙත යොමු කරන අතර, ඒ සඳහා සිය පෞද්ගලික අවධානය යොමු කරමින් ඊට කඩිනමින් විසඳුම් ලබාදීමට කාර්යාංශ සභාපතිවරයා කටයුතු කරන බවයි වාර්තා වන්නේ.
අභිනවයෙන් කාර්යාංශයට පත් වූ නව සභාපති කෝෂල චික්‍රමසිංහ මහතාගේ අදහසක් අනුව මෙම වැඩසටහන ක්‍රියාත්මක වන අතර, ඒ වෙනුවෙන් විශේෂ ඒකකයක් ද කාර්යාංශයේ ප්‍රධාන කාර්යාලයේ ස්ථාපනය කර තිබෙනවා.
මීට අමතරව, පැමිණිලි පෙට්ටියක් ද ස්ථාපනය කර ඇති අතර, ඊට යොමු කරන පැමිණිලි සඳහා ද විසඳුම් ලබාදීමට කටයුතු කෙරෙනු ඇති.
0112 – 864188 දුරකථන අංකය ඔස්සේ ද පැමිණිලි භාරගනු ලැබීම සිදු කෙරෙනවා.
0717 593 593 යන Whatsapp අංකය ඔස්සේ හා talktochairman@sible.lk ලිපිනය ඔස්සේ ද පැමිණිලි යොමු කිරීමට අවස්ථාව සලසා දී ඇති බවයි වාර්තා වන්නේ.
විගමණික ප්‍රජාවගේ ගැටලු විශ්වාසවන්තව ඉදිරිපත් කිරීමේ ක්‍රමවේදයක් හා කාර්යාංශය මගින් වඩාත් හිතකර හා සුහදශීලි සේවාවක් ජනතාවට ලබාදීමට මෙම වැඩසටහන ක්‍රියාත්මක වන අතර, සම්ප්‍රදාය අබිබවා නව වෙනසක් ලෙසින් කාර්යාංශය ජනතාවට සමිප කිරීම මෙමගින් බලාපොරොත්තු වනවා.
