වැලිකන්ද පොලිසිය මගින් මීට මාස කිහිපයකට පෙර අත්අඩංගුවට ගත් කිරි ගවයින් 20 දෙනෙකු, සැකකරුවන් දෙදෙනකු සමග අධිකරණයට ඉදිරිපත් කිරීමෙන් අනතුරුව එම කිරි ගවයන් රජයේ ගොවිපොළකට භාරදීමට නියෝග කර තිබියදී, නැවත ජාවාරම්කරුවන් දෙදෙනාටම විකිණීමේ සිද්ධියකට චෝදනා ලැබ සිටින වැලිකන්ද හිටපු පොලිස් ස්ථානාධිපතිවරයා අත්අඩංගුවට ගෙන අධිකරණයට ඉදිරිපත් කරන ලෙස පොළොන්නරුව අංක 02 මහේස්ත්‍රාත් එන්. අන්සර් සදාත් මහතා පොලිසියට නියෝග කර තිබෙනවා.
ඊයේ (18) මෙම නියෝගය නිකුත් කර ඇති බවත් අදාළ පොලිස් ස්ථානාධිපතිවරයාට විදෙස් ගමන් තහනමක් ද පනවා ඇති බවත් දසත ප්‍රාදේශීය වාර්තාකරු සඳහන් කළා.
අදාළ සිද්ධිය සම්බන්ධව වැලිකන්ද හිටපු පොලිස් ස්ථානාධිපතිවරයාට විරුද්ධව නිර්නාමික පෙත්සමක් මගින් පොළොන්නරුව මහේස්ත්‍රාත්වරයාට කරුණු දැක්වීමෙන් අනතුරුව මහේස්ත්‍රාත්වරයා ද පෞද්ගලිකව ඒ පිළිබඳ සොයා බලා ඇති බවයි පැවසෙන්නේ.
ඒ අනුව එහි විමර්ශන කටයුතු සිදු කරන ලෙසට පොලිස්පතිවරයාට සහ උතුරු මැද ජ්‍යේෂ්ඨ පොලිස් අධිකාරිවරයාට මහේස්ත්‍රාත්වරයා දැනුම්දී තිබෙනවා.
මෙම සිද්ධියට සම්බන්ධ සැකකරුවන් දෙදෙනෙකු පොලිසිය මගින් ඊයේ අධිකරණයට ඉදිරිපත් කර ඇති අතර ප්‍රධාන සැකකරු වන වැලිකන්ද හිටපු පොලිස් ස්ථානාධිපති පොලිස් පරීක්ෂකවරයා සැඟව සිටින බවට උතුරුමැද පළාත් ජ්‍යෙෂ්ඨ පොලිස් අධිකාරි කාර්යාලය මගින් අධිකරණයට දැනුම් දුන්නා.
D982025 /02 අංකය යටතේ විභාග වන මෙම නඩුවට අදාළ පොලිස් ස්ථානාධිපතිවරයාට එරෙහිව වරෙන්තුවක් නිකුත් කර අත්අඩංගුවට ගෙන අධිකරණයට ඉදිරිපත් කරන ලෙසට ද පොළොන්නරුව අංක 02 මහේස්ත්‍රාත් අන්සර් සදාත් මහතා පොලිසියට මෙහිදී නියෝග කළා.
