කාලගුණයේ අසීමිත වෙනස්වීම් සහ ගෘහස්ථ භාවිතය ඉහළ යාමත් වැඩි සමාගම් ගණනක් සේවකයින්ට නිවසේ සිට වැඩ කිරීමට ඉඩ සලසා තිබීමත් හේතුවෙන් ඉන්දියාවේ බලශක්ති ඉල්ලුම මෑත මාසවලදී ඉහළ ගොස් තිබෙනවා.
විදුලි ඉල්ලුම ඉහළ යාම හේතුවෙන් 2030 වසර දක්වා ගල් අඟුරු බලාගාර අඛණ්ඩව පවත්වාගෙන යන ලෙස ඉන්දීය බලධාරීන් විදුලිබල උපයෝගිතා ආයතනවලින් ඉල්ලා ඇති බව ඉන්දීය බලශක්ති අමාත්‍යාංශයේ දැන්වීමක් උපුටා දක්වමින් රොයිටර් පුවත් සේවය වාර්තා කළා.
ඉන්දියාව මෙවැනි තීරණයකට එළඹ ඇත්තේ 2030 වසර වන විට ඉන්ධන භාවිතය ක්‍රමානුකූලව අඩු කිරීමට කැපවන බවට තීන්දුකර වසර දෙකකට පසුවයි.
ඉදිරි වසර හතර තුළ අවම වශයෙන් ගල් අඟුරු බලාගාර 81කින් බලශක්ති උත්පාදනය අඩු කිරීමට සැලසුම් කරන බව ඉන්දියාව පසුගිය මැයි මාසයේදී ප්‍රකාශ කර තිබුණා.
නමුත් එහිදී ගල් අඟුරු බලාගාර 179න් කිසිවක් වසා දැමීමට තීරණය කර තිබුණේ නැහැ.
ගල් අඟුරු භාවිතය ක්‍රමක්‍රමයෙන් අඩු කිරීම සඳහාද ඉන්දියාව විධිමත් කාල සීමාවක් සකසා නැති බවයි විදෙස් මාධ්‍ය පෙන්වා දෙන්නේ.
ඉන්දීය මධ්‍යම විදුලිබල අධිකාරිය විදුලි උපයෝගීතා ආයතන වෙත නිවේදනය කර ඇත්තේ 2030 වන තෙක් කිසිදු තාප විදුලි උත්පාදන ඒකකයක් විශ්‍රාම නොගැන්විය යුතු අතර අවශ්‍ය නම් ප්‍රතිසංස්කරණ හා නවීකරණ කටයුතු සිදු කිරීමෙන් පසු ඒකකවල පැවැත්ම සහතික කළ යුතු බවයි.
විදුලිබල අමාත්‍යාංශයේ උපදේශකයෙකු ලෙස ක්‍රියා කරන ඉන්දීය මධ්‍යම පරිසර අධිකාරිය, දෙසැම්බර් මස පැවති රැස්වීමකදී කළ දැනුම්දීමක් උපුටා දක්වමින් මධ්‍යම බලශක්ති අමාත්‍යවරයා බලශක්ති අංශවලින් ඉල්ලා සිටියේ පැරණි තාප බලාගාර විශ්‍රාම නොගන්වා ඒ වෙනුවට අපේක්‍ෂිත ඉල්ලුම් තත්ත්වය සලකා එවැනි ඒකකවල ආයු කාලය වැඩි කරන ලෙසයි.
ලොව දෙවන විශාලතම ගල් අඟුරු පාරිභෝගිකයා, නිෂ්පාදකයා සහ ආනයනය කරන්නා වන ඉන්දියාවේ පුනර්ජනනීය බලශක්ති එකතු කිරීමේ ඉලක්කය 2022 වසරේ දී තුනෙන් එකකින් පමණ අඩු වුණා.
එරට වාර්ෂික විදුලි නිෂ්පාදනයෙන් හතරෙන් තුනකට ආසන්න ප්‍රමාණයකට දායක කර ගැනෙන්නේ ගල් අඟුරුයි.
කෙසේ වෙතත් ආන්තික කාලගුණය, ගෘහස්ථ භාවිතය වැඩිවීම, සේවකයින්ට නිවසේ සිට වැඩ කිරීමට ඉඩ සලසන සමාගම් සහ කොරෝනා ආශ්‍රිත සීමාවන් ලිහිල් කිරීමෙන් පසු කාර්මික ක්‍රියාකාරකම් ඉහළ යාම හේතුවෙන් ඉන්දියාවේ බලශක්ති ඉල්ලුම මෑත මාසවලදී ඉහළ ගොස් තිබුණා.
පසුගිය වසරේ අප්‍රේල් මාසයේදී ඉන්දියාවට බලපෑ දැඩි උෂ්ණාධික කාලගුණ තත්වය හමුවේ උපරිම බලශක්ති ඉල්ලුම ගිගාවොට් 207.1ක ඉල්ලුමකට පැමිණ තිබුණේ බලශක්තිය අවශ්‍යතාවෙහි උච්ඡතම අවස්ථාවට පැමිණෙමින්. එය සැලකුනේ වසර හය හමාරකට පසු ඉන්දියාව මුහුණ දුන් දරුණුතම විදුලි අර්බුදය ලෙසයි.
එහෙත් පසුගිය ජනවාරි 18 වැනි දා විදුලි ඉල්ලුම තවත් සියයට 1.7කින් ඉහළ ගොස් දිවා කාලයේ සැපයෙන උපරිම ඉල්ලුම ගිගාවොට් 210.6ක් තරම් ඉහළ අගයක් වාර්තා කර තිබුණා.
ඉන්දීය බලශක්තිය උපයෝගීතා ආයතන බලධාරීන් ප්‍රකාශ කරන්නේ මේ වසරේ උපරිම බලශක්ති ඉල්ලුම දැනටමත් 5%කින් ඉහළ ගොස් ඇති බවයි. එය තවත් 3-4%කින් ඉහත ගියහොත් තවත් අර්බුදයක් ලෙස බලා සිටීමට සිදුවනු ඇති බව ඔවුන් පෙන්වා දෙනවා.
