ඉන්දියාව සහ ශ්රී ලංකාව අතර ආර්ථික සහයෝගීතාව තවදුරටත් ශක්තිමත් කර ගැනීමට ඉමහත් විභවයක් පවතින බැවින්, අන්යෝන්ය ප්රතිලාභ සඳහා ද්විපාර්ශ්වික සබඳතා තහවුරු කළ යුතු බව ඉන්දීය ජාතික ආරක්ෂක උපදේශක අජිත් දොවාල් පවසනවා.
මෙරට නිල සංචාරයක නිරත ඉන්දීය ජාතික ආරක්ෂක උපදේශකවරයා අග්රාමාත්ය දිනේෂ් ගුණවර්ධන හමු වූ අවස්ථාවේ දී මේ බව සඳහන් කළා.
අග්රාමාත්ය දිනේෂ් ගුණවර්ධන සහ ඉන්දීය ජාතික ආරක්ෂක උපදේශක අජිත් දොවාල් අතර හමුවක් ඊයේ (29) අග්රාමාත්ය කාර්යාලයේ දී පැවැත් වුණා.
බලශක්ති ක්ෂේත්රය එක් ක්ෂේත්රයක් බව ප්රකාශ කළ අග්රාමාත්යවරයා මහා පරිමාණ සහ කුඩා පරිමාණ විකල්ප බලශක්ති ව්යාපෘති සඳහා සහාය දැක්වීම සම්බන්ධයෙන් මෙහිදී ඉන්දියාවට ස්තුතිය පළ කර සිටියා.
විදුලිබල උත්පාදනය සහ බෙදාහැරීම සඳහා පෞද්ගලික අංශයේ සහභාගිත්වය පහසු කිරීම සඳහා ලංකා විදුලිබල මණ්ඩල රෙගුලාසි සංශෝධනය කිරීමට රජය පියවර ගෙන ඇති බවත් සූර්ය හා සුළං බලශක්ති ව්යාපෘති සඳහා ඉන්දීය ආයෝජන වැඩි කළ හැකි බවත් අග්රාමාත්යවරයා පෙන්වා දුන්නා.
දිගු කාලීනව ශ්රී ලංකාවට දේශීය අවශ්යතාවයට වඩා වැඩි විදුලි ප්රමාණයක් නිපදවිය හැකි බවත්, අතිරික්ත විදුලිය ඉන්දියාවට විකුණා විශාල මූල්ය ප්රතිලාභ ලබාගත හැකි බවත් ඉන්දීය ජාතික ආරක්ෂක උපදේශකවරයා මෙහිදී සඳහන් කළා.
භූතානය විශාල වශයෙන් ජල විදුලිය නිපදවන අතර එය ඉන්දියාවට අලෙවි කරන බවත් එය එරට විශාලතම ආදායම බවත් ඔහු පෙන්වා දුන්නා.
ශ්රී ලංකාවේ ථෙරවාදී ආර්ථික ප්රතිපත්තිය පදනම් වී ඇත්තේ සියවස් 25 කට පෙර ගෞතම බුදුන් වහන්සේගේ සමයේ ඉන්දියාවේ පැවති ආර්ථික පිළිවෙත් අනුව බවත් එය ආර්ථික වර්ධනයට අනුපූරකයක් වනු ඇති බවත් අග්රාමාත්යවරයා මෙහි දී සඳහන් කළා.
සන්නද්ධ හමුදා සාමාජිකයින්ට සහ රාජ්ය සේවකයින්ට ඔවුන්ගේ කුසලතා සහ කාර්යක්ෂමතාව ඉහළ නැංවීම සඳහා ලබාදෙන පුහුණුව පිළිබඳව ද අග්රාමාත්යවරයා මෙහිදී ඉන්දියාවට ස්තූති කළා.
