විදෙස් රැකියා ලබාදෙන බව පවසා දිවයිනේ විවිධ ප්‍රදේශවල පුද්ගලයන්ගෙන් මුදල් වංචා කිරීම්වලට සම්බන්ධ සැකකරුවෙකු පොළොන්නරුව කොට්ඨාස අපරාධ විමර්ශන අංශය විසින් අත්අඩංගුවට ගෙන තිබෙනවා.
පෙරේදා (29) අත්අඩංගුවට ගත් මෙම පුද්ගලයා සම්බන්ධයෙන් සිදු කළ විමර්ශනයේදීයි මෙම තොරතුරු අනාවරණ වී ඇත්තේ. බණ්ඩාරගම ප්‍රදේශයේ පදිංචි සැකකරු 42 හැවිරිදි පුද්ගලයෙක්.
ඔහුට එරෙහිව ගනේමුල්ල, වැලිකඩ, මීගොඩ, ආනමඩුව, කඩවත, පිළියන්දල සහ කුරුණෑගල යන පොලිස් ස්ථාන වෙත මෙවැනි මුදල් වංචා සම්බන්ධයෙන් පැමිණිලි 14ක් ලැබී ඇති බව සඳහන්.
දැනට සිදු කළ විමර්ශණවලදී අනාවරණ වී ඇත්තේ මෙම පුද්ගලයා විදෙස් රැකියා ලබාදෙන බව පවසා රුපියල් මිලියන 10කට අධික මුදලක් වංචා කර ඇති බවටයි.
සැකකරුට පානදුර මහේස්ත්‍රාත් අධිකරණය මගින් වරෙන්තු 10ක් නිකුත් කර ඇති අතර පානදුර මහාධිකරණය මගින් එක් වරෙන්තුවක් නිකුත් කර තිබෙනවා.
සැකකරු පානදුර මහේස්ත්‍රාත් අධිකරණයට ඉදිරිපත් කිරීමෙන් පසු නියෝග කර ඇත්තේ ලබන 14 වනදා දක්වා රක්ෂිත බන්ධනාගාර ගත කිරීමටයි.
පොළොන්නරුව කොට්ඨාස අපරාධ විමර්ශන අංශය මගිනුයි වැඩිදුර විමර්ශන සිදුකරනු ලබන්නේ.
