අනුරාධපුර ශ්‍රාවස්තිපුර වදාකඩ ප්‍රදේශයේදී වන අලි පහරදීමකින් පුද්ගලයෙකු ජීවිතක්ෂයට පත්වී තිබෙනවා.
ඊයේ පස්වරුවේ මෙලෙස මියගොස් ඇත්තේ වදාකඩ ප්‍රදේශයේම පදිංචි 36 හැවිරිදි පුද්ගලයෙක්.
වන අලි පහර දීමෙන් මෙම පුද්ගලයා ජීවිතක්ෂයට පත්වීම හේතුවෙන් ප්‍රකෝප වූ ගම්වාසීන් පිරිසක් වන අලි ගැටලුවට විසඳුම් ඉල්ලා අද දහවල් ශ්‍රාවස්තිපුර පහේ ඇල ප්‍රදේශයෙන් ප්‍රධාන මාර්ගය වසා දමමින් උද්ඝෝෂණයක ද නිරත වූ බවයි අප වාර්තාකරු සඳහන් කළේ.
ජීවිතක්ෂයට පත් මෙම තරුණයා ඊයේ පස්වරුවේ සිය කුඹුරට ජලය හැරවීම සඳහා වදාකඩ වැව ආසන්නයෙන් මිතුරෙකු සමග යතුරු පැදියකින් ගමන් කරමින් සිටියදී මාර්ගය අසල සැඟව සිටි වන අලියෙකු මෙම පහර දීම සිදු කර තිබෙනවා.
එම ප්‍රහාරයෙන් බරපතල තුවාල ලැබූ පුද්ගලයා අනුරාධපුර ශික්ෂණ රෝහලට ඇතුලත් කිරීමෙන් අනතුරුව ජීවිතක්ෂයට පත්ව ඇති අතර ඔහු සමග ගමන් ගත් අනෙක් තරුණයා ද තුවාල ලබා අනුරාධපුර ශික්ෂණ රෝහලට ඇතුලත් කර ඇති බවයි අප වාර්තාකරු කියාසිටියේ.
ශ්‍රාවස්තිපුර, වදාකඩ, ගල්වඩුවාගම, රඹාවැව, කිඹුලාකඩ යන ගම්මානවල පවුල් දහසකට ආසන්න පිරිසක් ජීවත් වන අතර එම පිරිස් වන අලි තර්ජන හේතුවෙන් මේ වනවිට දැඩි භීතියකින් පසුවන බව උද්ඝෝෂකයින් ප්‍රකාශ කළා.
වන අලි ගැටලුව සම්බන්ධයෙන් වනජීවී නිලධාරීන් සමග සාකච්ඡා කර විසඳුමක් ලබා දෙන බවට පොලිසිය ප්‍රකාශ කිරීමෙන් අනතුරුව ප්‍රදේශවාසීන් විරෝධතාව අවසන් කර තිබුණා.
