පොසොන් සමයට වන්දනා ගමන් යන බැතිමතුන්ගේ ජීවිතාරක්ෂාව සඳහා විශේෂ වැඩපිළිවෙළක් සැකසීමට දඹුල්ල පොලිසිය කටයුතු යොදා තිබෙනවා.
ඒ මෙලෙස පැමිණෙන බැතිමතුන් විවිධ ගංගා, ඇළඳොළ, වැව් ආදියෙහි දිය නෑමට යොමු වන බැවින් දියෙහි සිදුවන අනතුරු වැළැක්වීමටයි ජීවිතාරක්ෂක වැඩපිළිවෙළක් යොදා ඇත්තේ.
අනුරාධපුර – පොළොන්නරුව වෙත වන්දනාවේ යන බැතිමතුන් දිය අනතුරුවලින් ආරක්ෂා කිරීමට මාතලේ කොට්ඨාස දඹුල්ල පොලිස් ජීවිතාරක්ෂක ඒකකය, AIA රක්ෂණ සමාගම සමග අත්වැල් බැඳ ගනිමින් මාතලේ දිස්ත්‍රිකයේ ඇති ප්‍රධාන වැව් අශ්‍රිත ව මෙම විශේෂ ජීවිතාරක්ෂක වැඩපිළිවෙළ දියත් කර තිබෙනවා.
ඒ සම්බන්ධ ව නිලධාරීන් හා ජීවිතාරක්ෂක සිසුන් දැනුවත් කිරීමක් ඊයේ (20) දඹුල්ල පොලිස් ජීවිතාරක්ෂක ඒකකය ඉදිරිපිට දී පැවැත්වුණා.
පොසොන් වන්දනාවේ පැමිණෙන බැතිමතුන් වෙනුවෙන් මෙවර මාතලේ දිස්ත්‍රිකයේ ඇති ප්‍රධාන වැව් අශ්‍රිත ව පුහුණුවලත් පොලිස් ජීවිතාරක්ෂක නිලධාරීන් 30 දෙනෙකු පාසැල් ජීවිතාරක්ෂක සිසුන් 25 දෙනෙකු යෙදවීමට කටයුතු කර ඇති බවයි දඹුල්ල පොලිස් ජීවිතාරක්ෂක ඒකකයේ ස්ථානධිපති උප පොලිස් පරීක්ෂක සුනිල් විජේසිංහ ප්‍රකාශ කළේ.
