රට තුළ ගංවතුර සහන ක්රියාමාර්ග සඳහා ලෝක බැංකුවෙන් ණය සහ ආධාර වශයෙන් පාකිස්තානයට ලැබුණු ඩොලර් මිලියන 400 ක අවභාවිතය පිළිබඳ චෝදනා සම්බන්ධයෙන් පාකිස්තාන මහජන පක්ෂයේ (පීපීපී) සභාපති බිලාවල් භූතෝ සර්දාරි විසින් කරන ලද ප්රකාශයන් එක්සත් ජනපදය පිළිගෙන තිබෙනවා.
ගංවතුරෙන් විපතට පත් වූවන් සඳහා නොවන ව්යාපෘති සඳහා මුදල් භාවිතා කළ බවට බිලාවල් භූතෝ පාකිස්තාන මධ්යම රජයට චෝදනා කළා.
මෑත වසරවල ගංවතුරෙන් විපතට පත් වූවන් සඳහා එක් නිවසක් හෝ ඉදිකර දීමට රජයට නොහැකි වීම ගැන බිලාවල් රජයට දෝෂාරෝපණය කළ අතර ආධාර එහි අපේක්ෂිත අරමුණට හරවා යවන ලෙස ඉල්ලා සිටියා.
චෝදනාවලට ප්රතිචාර දක්වමින් එක්සත් ජනපද රාජ්ය දෙපාර්තමේන්තු ප්රකාශක මැතිව් මිලර්, ඔක්තෝබර් 2 දා මාධ්ය හමුවක දී අවධාරණය කළේ, එක්සත් ජනපදය තත්ත්වය සමීපව නිරීක්ෂණය කරන බවයි.
“අපි මේ කාරණය ඉතා බැරෑරුම් ලෙස සලකමු, පකිස්ථානයේ පමණක් නොව, අමෙරිකානු බදු ගෙවන්නන්ගේ ඩොලර් භාවිතා කරන සෑම තැනකම සහ හදිසි මානුෂීය අවශ්යතා පරදුවට තැබෙන ඕනෑම තැනක” ඔහු පැවසුවා.
රාජ්ය දෙපාර්තමේන්තුව සහ USAID යන දෙකම රට විසින් ලබා දෙන විදේශ ආධාර භාවිතය නිරීක්ෂණය කිරීමට සහ ඇගයීමට දැඩි ප්රොටෝකෝල අනුගමනය කරන බව මිලර් පැහැදිලි කළා.
පකිස්ථානයේ ගංවතුර සහන සම්පත් අනිසි ලෙස භාවිතා කිරීම සම්බන්ධයෙන් ඇති විය හැකි කනස්සල්ල පෙන්නුම් කරමින්, කිසියම් වැරදි මඟ පෙන්වීමක් හෝ මුදල් අවභාවිතයක් නිරීක්ෂණය වුවහොත් ආධාර නතර කරන බව ද මිලර් පැවසුවා.
