ශ්‍රී ලංකා නාවික හමුදාවේ සමුද්‍රීය පරිසර සංරක්ෂණ වැඩසටහන යටතේ, ජුනි මස 05 වන දිනට යෙදුණ ලෝක පරිසර දිනයට සමගාමී ව මීගමුව වෛක්කාල කලපු ප්‍රදේශයේ කඩොලාන පැල රෝපණය කිරීමේ වැඩසටහනක් පැවැත්වුවා.
නාවික හමුදා මාධ්‍ය අංශය නිවේදනයක් නිකුත් කරමින් සඳහන් කළේ ශ්‍රී ලංකා නාවික හමුදාව, DFCC බැංකුව හා එක්ව මෙම වැඩසටහන පසුගියදා (07) පැවැත්වූ බවයි.
වෙරළාශ්‍රිත පරිසර පද්ධතියේ ජෛව විවිධත්වය හා තිරසාරත්වය රැකදීම වෙනුවෙන් විශාල දායකත්වයක් දක්වන කඩොලාන පරිසර පද්ධතිය සංරක්ෂණය ඇතුළු පරිසර සංරක්ෂණ වැඩසටහන් සඳහා ශ්‍රී ලංකා නාවික හමුදාව නිරන්තර දායකත්වය දක්වනවා.
ස්වාභාවික හේතූන් මත කලපු, ගංගා, මෝය සහ ඉවුරු ආශ්‍රිත වෙරළ පරිසරය ඛාදනය වැළැක්වීම, ඉහළ කාබන්ඩයොක්සයිඩ් අවශෝෂණ හැකියාව තුළින් වාතාශ්‍රය පිරිසිදු වීම හා දිගුකාලීන ගෝලීය උණුසුම පාලනය, මත්ස්‍යයන් හට ස්වාභාවික අභිජනන පරිසරයක් නිර්මාණය කිරීම වැනි ඉහළ පාරිසරික වටිනාකමක් ඇති මෙම කඩොලාන පරිසර පද්ධතිය අනාගතය වෙනුවෙන් සංරක්ෂණය කිරීම සඳහා නාවික හමුදාව විසින් මෙම වැඩසටහන ක්‍රියාත්මක කරනු ඇති.
බටහිර නාවික විධානයේ ශ්‍රී ලංකා නාවික නෞකා කැළණි ආයතනය, DFCC බැංකුව හා එක්ව මීගමුව වෛක්කාල කලපු ප්‍රදේශයේ දී මෙම කඩොලාන පැල රෝපණය කිරීමේ වැඩසටහන යටතේ කඩොලාන පැල 400ක් රෝපණය කිරීම සිදු කෙරුණා.
මෙම අවස්ථාව සඳහා ශ්‍රී ලංකා නාවික නෞකා කැළණි ආයතනයේ අණදෙන නිලධාරි කපිතාන් තරංග ජයසූරිය, DFCC බැංකුවේ කාර්ය මණ්ඩලය, ශ්‍රී ජයවර්ධනපුර විශ්ව විද්‍යාලයේ ආචාර්යවරුන් සහ විශ්වවිද්‍යාල සිසුන්, වෙරළ සංරක්ෂණ දෙපාර්තමේන්තුවේ නියෝජිතයින්, වෙන්නප්පුව පොලිස් ස්ථානයේ නිලධාරීන් සහ ශ්‍රී ලංකා නාවික නෞකා කැළණි ආයතනයේ ජ්‍යේෂ්ඨ හා කනිෂ්ඨ නිලධාරීන් සහ නාවිකයින් පිරිසක් එක් ව සිටියා.
