රුපියල් 2,175,000ක් වටිනා විදේශීය දුම්වැටි තොගයක් සමග ව්‍යාපාරිකයන් දෙදෙනෙකු කටුනායක ගුවන් තොටුපොළේ දී පොලිස් මත්ද්‍රව්‍ය නාශක අංශය විසින් අත් අඩංගුවට ගෙන තිබෙනවා.
මෙලෙස අත්අඩංගුවට ගෙන ඇත්තේ කඩවත සහ මීගමුව ප්‍රදේශවල පදිංචිකරුවන් දෙදෙනෙක්.
මීගමුව ප්‍රදේශයේ පදිංචි 24 හැවිරිදි ව්‍යාපාරිකයා අද අලුයම 04ට සජා සිට ගල්ෆ් එයාර් ගුවන් සේවයේ G- 9500 දරන ගුවන් යානයෙන් කටුනායක ගුවන් තොටුපොළ වෙත පැමිණ තිබූ බවයි අප වාර්තාකරු සඳහන් කළේ.
කඩවත ප්‍රදේශයේ පදිංචි 30 හැවිරිදි අනෙක් ව්‍යාපාරිකයා අද උදෑසන 10.30ට ඉන්දියාවේ චෙන්නායි සිට ශ්‍රී ලන්කන් ගුවන් සේවයේ UL- 122 දරන ගුවන් යානයෙන් කටුනායක ගුවන් තොටුපොළ වෙත පැමිණ තිබුණා.
මොවුන් රැගෙන ආ ගමන් මලු තුළ “මැන්චෙස්ටර්” සහ “බෙන්සන් ඇන්ඩ් හෙජස්” වර්ගයේ දුම්වැටි 17,400ක් අඩංගු දුම්වැටි කාටූන් 87ක් සඟවා ගෙන සිටියදී පොලිස් මත්ද්‍රව්‍ය නාශක අංශයේ නිලධාරීන් විසින් සොයා ගෙන තිබෙනවා.
මෙම ව්‍යාපාරිකයන් දෙදෙනා පොලිස් ඇප මත මුදා හැරීමට කටුනායක ගුවන් තොටුපොළ පොලිස් මත්ද්‍රව්‍ය නාශක අංශයේ නිලධාරීන් පියවර ගෙන ඇති අතර ලබන 26 වනදා ඔවුන් රැගෙන ආ දුම්වැටි තොගය සමග මීගමුව මහේස්ත්‍රාත් අධිකරණය වෙත ඉදිරිපත් කිරීමට නියමිතයි.
