රිදී – ලෝකඩ පදක්කම් දිනූ කඟවේන්නු දිවයිනට – ඔලිම්පික් බලාපොරොත්තුවකුත්? (ඡායාරූප)

ස්පාඤ්ඤයේ පැවති ජාත්‍යන්තර ආරාධිත මලල ක්‍රීඩා තරගාවලියට සහභාගී වී ඉන් රිදී පදක්කමක් සහ ලෝකඩ පදක්කමක් දිනා ගත් ධාවන ශූර තරුෂි කරුණාරත්න සහ කාලිංග කුමාර අද (20) උදෑසන දිවයිනට පැමිණියා.

මෙම තරගාවලිය ස්පාඤ්ඤයේ “බිල්බාවෝ” නුවර දී ඉකුත් 18 වැනි දින පැවැත්වුණා.

එහිදී ශ්‍රී ලංකාව නියෝජනය කරමින් මීටර් 600 ධාවන ඉසව්ව සඳහා තරග කළ තරුෂි කරුණාරත්න විනාඩි 01.24.84 ක කාලයකින් තරගය නිමකර රිදී පදක්කම දිනා ගත්තා.

එය මෙතෙක් ආසියාවේ මෙම තරග ඉසව්ව සඳහා වාර්තා වී ඇති හොදම කාලය ලෙසයි වාර්තා පොත් අතරට එක්වන්නේ.

මෙම ජයග්‍රහණයත් සමග තරුෂි කරුණාරත්න ලෝක ශ්‍රේණිගත කිරීම්වල 45 වන ස්ථානය දක්වා ඉහළට පැමිණ තිබෙනවා. 

ඔලිම්පික් තරග සහභාගී වීමට ලෝක ශ්‍රේණිගත කිරීම්වල 48 වැනි ස්ථානය දක්වා අවස්ථාව හිමි වන අතර තරුෂි කරුණාරත්න ඒ අනුව ඔලිම්පික් පරිසාදන මට්ටම පසු කර ඇති බව ශ්‍රී ලංකා මලල ක්‍රීඩා ආයතනයේ ලේකම් සමන් කුමාර කටුනායක ගුවන් තොටුපොළේ දී මාධ්‍ය වෙත අදහස් දක්වමින් සඳහන් කළා.

මේ අතර මෙම තරගාවලියේ දී මීටර් 400 පිරිමි ධාවන ඉසව්ව සඳහා සහභාගී වූ කාලිංග කුමාර එම ඉසව්ව තත්පර 45.91කින් නිමා කර එහි ලෝකඩ පදක්කම දිනා ගැනීමට සමත් වුණා.

මෙම ජයග්‍රහණයත් සමග කාලිංග කුමාර ලෝක ශ්‍රේණිගත කිරීම්වල 53 වන ස්ථානය කරා පැමිණ තිබෙනවා.

මෙම ක්‍රීඩකයින් දෙපළ සහභාගී වන තරගාවලි දෙකක් එළඹෙන ජුනි 25-27 තෙක් ජාතික ශූරතා තරගාවලිය දියගම ක්‍රීඩාංගණයේදීත්, තවත් විශේෂ තේරීමේ තරගාවලියක් එළඹෙන 30 වැනි දින කොළඹ සුගතදාස ක්‍රීඩාංගණයේ දීත් පැවැත්වීමට නියමිතයි.

එම තරගාවලි දෙකටම මෙම ක්‍රීඩකයින් දෙපළ සහභාගී වීමට නියමිත අතර එහිදී ඔවුන් දක්වන දස්කම් මත තරුෂි කරුණාරත්න ලෝක ශ්‍රේණිගත කිරීම්වල 39 වැනි ස්ථානයටත්, කාලිංග කුමාර ද නිසැකවම ඔලිම්පික් පරිසාදන මට්ටමට යමින් ඔලිම්පික් තරගාවලිය සඳහා ශ්‍රී ලංකාව නියෝජනය කරමින් සහභාගී වීමට වරම් ලබා ගනු ඇතැයි ශ්‍රී ලංකා මලල ක්‍රීඩා ආයතනය බලාපොරොත්තු වනවා.