රාගම වෛද්‍ය පීඨයේ සිසුන් පිරිසකට පහරදීමේ සිද්ධිය සම්බන්ධයෙන් අත්අඩංගුවට ගත් සැකකරුවන් හෙට (03) දිනය දක්වා රක්ෂිත බන්ධනාගාර ගතකර තිබෙනවා.
මේ අතර රාගම වෛද්‍ය පීඨයේ සිසුන් පිරිසකට පහරදීමේ සිද්ධියට 6 දෙනෙකු අත්අඩංගුවට ගෙන තිබෙන බව මාධ්‍ය හමුවකට එක්වෙමින් ජ්‍යෙෂ්ඨ පොලිස් මාධ්‍ය ප්‍රකාශක ජ්‍යෙෂ්ඨ නියෝජ්‍ය පොලිස්පති අජිත් රෝහණ ප්‍රකාශ සිටියා.
එම ප්‍රහාරයෙන් තුවාල ලැබු සරසවි සිසුන් තිදෙනෙක් රාගම ශික්ෂණ රෝහලට ඇතුළත් කර එක් අයෙක් මීගමුව රෝහලට යැවූ බව ද පොලීසිය සඳහන් කර සිටියේ.
සිද්ධිය සම්බන්ධයෙන් වැඩිදුරටත් අදහස් දැක්වූ ජ්‍යෙෂ්ඨ පොලිස් මාධ්‍ය ප්‍රකාශක, ජ්‍යෙෂ්ඨ නියෝජ්‍ය පොලිස්පති අජිත් රෝහණ මහතා,
“රාගම සිද්ධියට පැමිණි පිරිසෙන් පුද්ගලයින් 6 දෙනෙකු මේ වනවිට හඳුනගෙන තිබෙනවා. ඒ අනුව ඔවුන්ව අත්අඩංගුවට ගෙන තිබෙනවා. මෝටර් රථයේ රියදුරාවත් අත්අඩංගුවට ගත්තා. අද සවස රාගම පොලිස් ස්ථානයට පැමිණ තිදෙනෙක් භාරවෙලා තිබෙනවා.
තුවාල ලබා මීගමුව රෝහලේ ප්‍රතිකාර ලබන සැකකාර වෛද්‍ය සිසුවා හැර අනෙක් සැකකරුවන් අද අධිකරණයට ඉදිරිපත් කරනවා. සිද්ධිය සිදුවෙන අවස්ථාවේ ඒ ආසන්නයේ සිටි සාක්ෂිකරුවන්ගේ ප්‍රකාශ 10කට ආසන්න ප්‍රමාණයක් සටහන් කරගෙන තිබෙනවා.
සැකකරුවන්ට එරෙහිව පහරදීම, තුවාල සිදුකිරීම, අයුතු ඇතුල්වීම, නීතිවිරෝධී ඒකරාශිවීමක සාමාජිකයින්වීම, රාජ්‍ය ආයතනයකට අයත් වාහනයක් අයුතු ලෙස පරිහරණය කිරීම යන වැරදි යටතේ සැකකරුවන් අධිකරණයට ඉදිරිපත් කරනවා.
ඒ වාගේම සිද්ධියට සම්බන්ධ අනෙක් සැකකරුවන් සොයා විමර්ශන ක්‍රියාත්මකයි” ජේෂ්ඨ පොලිස් මාධ්‍ය ප්‍රකාශක ජේෂ්ඨ නියෝජ්‍ය පොලිස්පති අජිත් රෝහණ ප්‍රකාශ කර සිටියා.
“රාගම රෝහලේ ප්‍රතිකාර ලබන වෛද්‍ය සිසුන් තිදෙනාගෙන් දීර්ඝ වශයෙන් ප්‍රශ්න කර ප්‍රකාශ සටහන් කරගන්නවා. සිසුන් සතුව ඇති වීඩියෝ පොලීසිය භාරයට ගෙන පරීක්ෂණ කරනවා.”
