මෙවර ජනාධිපතිවරණයට ඉදිරිපත් වීමේ දී පිළිගත් පොදු දේශපාලන පක්ෂයකින් යම් කිසිවෙකු තරග වදින්නේ නම් ඔහුගේ හෝ ඇයගේ ඇප මුදල් ගාස්තුව රුපියල් 50,000ක් බව මැතිවරණ කොමිෂන් සභාව පවසනවා.
මේ වනවිට (26) මැතිවරණ කොමිෂන් සභාවේ පැවැත්වෙන විශේෂ මාධ්ය හමුවකට එක්වෙමින් එහි සභාපති ආර්. එම්. ඒ රත්නායක මහතා සඳහන් කළේ; වෙනත් දේශපාලන පක්ෂයකින් හෝ ඡන්ද දායකයෙකු විසින් ජනාධිපති අපේක්ෂකත්වයට ඉල්ලන්නේ නම්; එම ඇප මුදල් ප්රමාණය රුපියල් 75,000ක් වන බවයි.
ඒ අනුව අද දිනයේ සිට එළඹෙන අගෝස්තු මස 15 වැනි දින තෙක් ජනාධිපතිවරණයට නාම යෝජනා භාර ගනු ඇති.
එය අගෝස්තු මස 15 වැනි දින දහවල් 12යින් අවසන් වීමට ද නියමිත ව තිබෙනවා.
මේ අතර මෙවර ජනාධිපතිවරණයට ඇප මුදල් තැන්පත් කළ පළමු ජනාධිපති අපේක්ෂකයා වත්මන් ජනාධිපති රනිල් වික්රමසිංහ බවට පත් ව තිබෙනවා.
ඒ අද පෙරවරුවේ ම තමන්ට නියමිත ඇප මුදල් ප්රමාණය මැතිවරණ කාර්යාලයේ මුදල් අංශයේ තැන්පත් කිරීමට ජනාධිපතිවරයා කටයුතු කිරීම නිසාවෙන්.
ඒ අනුව සැප්තැම්බර් 21 වෙනිදා පැවැත්වීමට නියමිත ජනාධිපතිවරණය සඳහා ස්වාධීන අපේක්ෂකයෙකු ලෙස රනිල් වික්රමසිංහ මහතා තරග කරනු ඇති.
ජනාධිපති නීතිඥ රොනල්ඩ් පෙරේරා ඇතුළු නීතීඥ පිරිසක් විසිනුයි වත්මන් ජනාධිපතිවරයා වන රනිල් වික්රමසිංහ වෙනුවෙන් ඇප මුදල් තැන්පත් කරනු ලැබුවේ.
