41 හැවිරිදි පුද්ගලයෙකුගේ බැංකු ගිණුමකට කෝටියකට අධික මුදලක් ලැබුණු ආකාරය තහවුරු කිරීමට නොහැකි වීම හේතුවෙන් අදාළ පුද්ගලයා ඊයේ (30) අපරාධ පරීක්ෂණ දෙපාර්තමේන්තුවේ නිලධාරීන් විසින් අත්අඩංගුවට ගෙන තිබෙනවා. ඒ චාවකච්චේරිය ප්රදේශයේ පදිංචි පුද්ගලයෙක්. විදේශ රටක සිට එක් කෝටි තිස් හතර ලක්ෂ විසිතුන් දහස් එකසිය අනුහතක (1,34,23197) මුදලක් මොහුගේ ගිණුමට ලැබී ඇති බවත් විදේශ රටක සිටින පුද්ගලයෙකුගෙන් මෙම ගිණුමට මුදල් ලැබී ඇති බවටත් වාර්තා වන බවයි පොලිස් මාධ්ය ප්රකාශක නියෝජ්ය පොලිස්පති අජිත් රෝහණ මහතා සඳහන් කරන්නේ.
මේ පිළිබඳව විශේෂ විමර්ශනයක් ආරම්භ කර ඇති අතර විශේෂයෙන් ඇමරිකා එක්සත් ජනපදයේ සිටින ශ්රී ලංකාවෙන් ගිය පුද්ගලයින්, එරට පුද්ගලයින්ගේ ගිණුම්වලට අනවසරයෙන් පිවිස විද්යුත් මාධ්යයෙන් මෙරටට මුදල් එවන බවයි පොලිස් මාධ්ය ප්රකාශකවරයා වැඩිදුරටත් සඳහන් කළේ.
මෙවන් පැමිණිලි ගණනාවක් අපරාධ පරීක්ෂණ දෙපාර්තමේන්තුවට ලැබී ඇති අතර රුපියල් කෝටි 14කට අධික මුදලක් 2020 අවුරුද්දේ අප්රේල් සිට මේ දක්වා මෙරටට මුදල් එවා ඇති බවද ඒ මහතා සඳහන් කරනවා. අත්අඩංගුවට ගත් සැකකරු අධිකරණයට ඉදිරිපත් කිරීමට නියමිතයි.
