රජයේ ප්රමුඛ ව්යාපෘති සඳහා මූල්ය හා තාක්ෂණික සහාය ලබාදීමට කටයුතු කරන බව ලෝක බැංකුවේ දකුණු ආසියා කලාපයේ උප සභාපති මාර්ටින් රේසර් (Martin Raiser) මහතා ප්රකාශ කළා.
ජනාධිපති අනුර කුමාර දිසානායක මහතා හා ලෝක බැංකු නියෝජිතයන් අතර ජනාධිපති කාර්යාලයේ අද (21) පැවති හමුවේ දී ලෝක බැංකුවේ දකුණු ආසියා කලාපයේ උප සභාපති මාර්ටින් රේසර් (Martin Raiser) මහතා මේ බව කියා සිටියා.
තරුණ තරුණියන්ට රැකියා උත්පාදනය කිරීමේ වැඩසටහන, ක්ලීන් ශ්රී ලංකා, ග්රාමීය දිළිඳුබව තුරන් කිරීම, හා ඩිජිටල්කරණ ව්යාපෘති සඳහා ලෝක බැංකුවේ මූල්ය සහ තාක්ෂණික ආධාර ලබාදීමට මෙහිදී එකඟතාව පළ වුණා.
ඒ අනුව අධ්යාපන, බලශක්ති, ඩිජිටල්කරණ හා උතුරු සංවර්ධනය සඳහා වූ නව ව්යාපෘති සඳහා ආධාර ලබා දීම පිළිබඳව ද මෙහිදී සාකච්ඡා කෙරුණා.
ලෝක බැංකුව මගින් ශ්රී ලංකාවට ලබාදීමට අනුමත ණය ආධාර නියමිත දිනට ලබාදීමට කටයුතු කරන බව ද මාර්ටින් රේසර් (Martin Raiser) මහතා මෙහිදී සඳහන් කළා.
මෙහිදී අදහස් දැක්වූ ජනාධිපතිවරයා සඳහන් කළේ අධ්යාපන ක්ෂේත්රය සංවර්ධනය කිරීමෙන් ග්රාමීය දුප්පත්භාවය තුරන් කිරීමට හැකි බවයි.
ඒ සඳහා නව රජය ආරම්භ කර තිබෙන අධ්යාපන ප්රතිසංස්කරණ කටයුතු සඳහා ද, පොදු ප්රවාහන ක්ෂේත්රයෙහි සංවර්ධනය සඳහා ද අවශ්ය ආධාර ලබාදෙන ලෙස ජනාධිපතිවරයා මෙහිදී ලෝක බැංකු නියෝජිතයන්ගෙන් ඉල්ලා සිටියා.
ශ්රී ලංකාවේ ශ්රම බලකායෙන් 28%ක් කෘෂිකාර්මික ක්ෂේත්රය නියෝජනය කළත්, ශ්රී ලංකා ආර්ථිකයට කෘෂිකාර්මික ක්ෂේත්රයෙන් ලබාදෙන දායකත්වය දල දේශීය නිෂ්පාදිතයෙන් 6%ක් පමණක් වීම ප්රමාණවත් නොවන බව ජනාධිපතිවරයා පෙන්වාදුන්නා.
ශ්රී ලංකාවේ ජන ඝනත්වය අනුව ජනතාවට අවශ්ය පහසුකම් ලබාදීමට නව රජය ගෙන යන වැඩපිළිවෙළ මෙහිදී ජනාධිපතිවරයා විසින් ලෝක බැංකු නියෝජිතයින්ට පැහැදිලි කරනු ලැබුවා.
තරුණ ප්රජාව සඳහා රැකියා උත්පාදනය සම්බන්ධයෙන් රජය සතු වැඩපිළිවෙළ පිළිබඳව ද මෙහිදී සාකච්ඡාවට ලක් වූ අතර, 2025 වසරේ දී මෙරටට වැඩිපුර සංචාරකයින් ආකර්ෂණය කිරීම සඳහා නව වැඩසටහන් ක්රියාත්මක කිරීම පිළිබඳව ද මෙම සාකච්ඡාවේ දී අවධානයට ලක් කෙරුණා.
ගුවන්තොටුපළ හා වරාය සංවර්ධනය සඳහා නව සැලසුම් ක්රියාත්මක කරන බවත් වරාය සංවර්ධනය කිරීම කඩිනමින් සිදු කරන බවත් ජනාධිපති අනුර කුමාර දිසානායක මහතා ප්රකාශ කළා.
විශේෂයෙන්ම උතුරු සංවර්ධනය සඳහා රජය වැඩි අවධානයක් යොමු කර ඇති බවත් උතුරේ ආයෝජන කලාප තුනක් ඇති කිරීමට කටයුතු කරන බවත් ජනාධිපතිවරයා මෙහිදී පැවසුවා.
උතුරේ සංචාරක ක්ෂේත්රය දියුණු කිරීම, ජල පහසුකම් ලබාදීම, උතුරේ ජනතාවගේ සමාජ ප්රශ්නවලට ඔවුන්ගේ සංස්කෘතික අනන්යතා රැක ගනිමින් විසඳුම් සෙවීමට ද කටයුතු කරන බව ජනාධිපතිවරයා සඳහන් කළා.
කම්කරු අමාත්ය හා ආර්ථික සංවර්ධන නියෝජ්ය අමාත්ය ආචාර්ය අනිල් ජයන්ත ප්රනාන්දු, ජනාධිපති ලේකම් ආචාර්ය නන්දික සනත් කුමානායක, ලෝක බැංකුවේ කලාපීය දේශීය අධ්යක්ෂ (නේපාලය, මාලදිවයින, ශ්රී ලංකාව) ඩේවිඩ් සිස්ලන් (David Sislen), ලෝක බැංකුවේ සහ ජාත්යන්තර මූල්ය සංස්ථාව (IFC) (ශ්රී ලංකාව සහ මාලදිවයින) දේශීය කළමනාකාර ගෙවෝර්ග් සාර්ග්ස්යන් (Gevorg Sargsyan), උප සභාපතිගේ විශේෂ සහකාර කිෂාන් අබේගුණවර්ධන යන මහත්වරු මෙම අවස්ථාවට එක් ව සිටියා.
