යතුරුපැදි සොරකම් සහ වාහනවල පැති කණ්නාඩි සොරකම්වලට සම්බන්ධ පුද්ගලයෙකු හෙරොයින් සමග පොලිස් අත්අඩංගුවට ගෙන තිබෙනවා.
ඊයේ (10) දහවල් ආදුරුප්පුවීදිය මධ්‍යම පාර ප්‍රදේශයේදී නතර කර තිබූ වෑන් රථයක් අසල සැක කටයුතු ලෙසට ගැවසෙමින් සිටි පුද්ගලයෙකු පරීක්ෂා කිරීමේදී යි හෙරොයින් ග්‍රෑම් 2යි මිලිග්‍රෑම් 940ක් සොයා ගැණුනේ.
අදාළ යතුරුපැදිය තවදුරටත් පරීක්ෂා කිරීමේදී එහි අසුන යට කුටිය තුල තිබී යතුරුපැදියකින් ගලවා ඉවත් කරන ලද අංක තහඩු දෙකක් සහ මෝටර් රථවලට අයත් පැති කණ්නාඩි දෙකක් මෙන්ම ඉස්කුරුප්පු නියන් දෙකක් ද හමුවී තිබෙනවා.
ඒ අනුවයි සැකකරු පොලිස් අත්අඩංගුවට ගෙන ඇත්තේ. මෙම පුද්ගලයා රාගම වල්පොල ප්‍රදේශයේ පදිංචි 43 හැවිරිදි අයෙක්.
සැකකරු සම්බන්ධයෙන් සිදු කළ වැඩිදුර විමර්ශනයේදී අනාවරණ වී ඇත්තේ ඔහු පැමිණි යතුරුපැදිය කඳාන ප්‍රදේශයෙන් සොරකම් කළ එකක් බවයි.
කඳාන, ගනේමුල්ල, මාලිගාවත්ත, රාගම හා ජාඇල පොලිස් වසම්වල යතුරුපැදි සොරකම් කර විවිධ පුද්ගලයන්ට අලෙවි කර ඇති අතර වාහනවල පැති කණ්නාඩි ගලවා සොරකම් කිරීම සම්බන්ධයෙන් ද අනාවරණ වී තිබෙනවා.
වැලිසර, මීගමුව සහ මහර මහේස්ත්‍රාත් අධිකරණ මගින් විභාග වන නඩු කිහිපයක් සම්බන්ධයෙන් සැකකරුට වරෙන්තු ද නිකුත් කර ඇති බවටයි හෙළිවී ඇත්තේ.
මෙම පුද්ගලයා අද මාලිගාකන්ද මහේස්ත්‍රාත් අධිකරණයට ඉදිරිපත් කිරීමට නියමිතයි. ආදුරුප්පුවීදිය පොලිසිය වැඩිදුර විමර්ශන සිදුකරනවා.
