මේ දිනවල දරුවන් අතර උණ හා කැස්ස මෙන් ම සෙම්ප්‍රතිශ්‍යා තත්ත්වයේ ඉහළ යාමක් දක්නට ලැබෙන බැවින් ඒ පිළිබඳ ව දැඩි අවධානයෙන් පසුවන ලෙස කොළඹ රිජ්වේ ආර්යා ළමා රෝහලේ විශේෂඥ වෛද්‍ය දීපාල් පෙරේරා පවසනවා.
විශේෂඥ වෛද්‍යවරයා පෙන්වා දෙන්නේ; මේ සමග ම ඉන්ෆ්ලුවන්සා තත්ත්වයේ ද වර්ධනයක් දැකගත හැකි බවයි.
ශීත දේශගුණයක් සහිත රටවල්වල ඉන්ෆ්ලුවන්සා රෝගී තත්ත්වයෙන් ආරක්ෂා වීම සඳහා ප්‍රතිශක්තිකරණ එන්නතක් ලබාදෙන බවත් මෙය අවුරුදු 02ට අඩු දරුවන්, අවුරුදු 65ට වැඩි වැඩිහිටියන්, ගර්භණී මාතාවන්, ශ්වසන රෝග නිදන්ගතව පවතින පුද්ගලයන් සහ ප්‍රතිශක්තීකරණය අඩු අයට තරමක් භයානක විය හැකි බව ද හෙතෙම පවසනවා.
එමෙන්ම මෙම වයස් කාණ්ඩයන් හි රෝගීන් සඳහා මෙම වෛරසය වැළඳුණහොත් එය අතිශය භයානක විය හැකි බවයි වෛද්‍ය දීපාල් පෙන්වා දෙන්නේ.
නියුමෝනියා තත්ත්වයක් දක්වා වර්ධනය වීම සේ ම එහි අවසානය දැඩි සත්කාර ඒකක වෙත ඇතුළත් කිරීම විය හැකි බවට ද ඔහු අනතුරු අඟවනවා.
ඉන්ෆ්ලුවෙන්සා පැතිරීම වළක්වා ගැනීමට රෝග ලක්ෂණ ඇති අය මුඛ ආවරණයක් පැළඳීම අනිවාර්‍යය බවත්; එම රෝග ලක්ෂණ ඇති කිසිවෙක් එළිමහනේ ගැවසීම හෝ අධ්‍යයන මධ්‍යස්ථාන සහ රැකියා මධ්‍යස්ථාන, පොදු ස්ථාන වෙත විවෘත නොවිය යුතු බවත් විශේෂඥ වෛද්‍ය දීපාල් ද සිල්වා වැඩිදුරටත් අවධාරණය කරනවා.
