සංචාරක ඉන්දීය කණ්ඩායම සහ ඔස්ට්‍රෙලියාව අතර පැවැත්වෙන සිව්වැනි ටෙස්ට් තරගයේ දෙවැනි දිනය නිමාවන විට (27) ඉන්දීය කණ්ඩායම කඩුලු 05ක් දැවී ලකුණු 164ක් ලබා සිටිනවා.
ඊයේ (26) දෙරට අතර තරගය නත්තල් දිනයෙන් පසුව මෙල්බර්න් නුවර දී බොක්සිං දින ටෙස්ට් තරගයක් ලෙසයි ආරම්භ කෙරුණේ.
තරගයේ කාසියේ වාසිය දිනූ ඔස්ට්‍රෙලියා කණ්ඩායම පළමු ව පන්දුවට පහරදීමට තීරණය කළා.
ඒ අනුව ඔස්ට්‍රෙලියාව සිය පළමු ඉනිමට සියල්ලන් ම දැවී ලකුණු 474ක් රැස් කරගත්තා.
විශිෂ්ට ඉනිමක් ක්‍රීඩා කළ ස්ටීවන් ස්මිත් ලකුණු 140ක් ලබා ගත්තා.
සිය මංගල ටෙස්ට් තරගයේ දී ම වේගවත් ටෙස්ට් අර්ධ ශතකයක් ලැබූ සෑම් කොන්ස්ටස් ලකුණු 60ක් සහ මාර්නස් ලබුෂේන්ග් හා උස්මන් කවජා අර්ධ ශතක බැගින් ලබා ගත්තා.
කඩුලු බිඳ දැමීමේ දී බුම්‍රා කඩුලු 04ක්, ජඩේජා කඩුලු 03ක්, අකාෂ් ඩීප් කඩුලු 02ක් සහ එක් කඩුල්ලක් වොෂින්ටන් සුන්දර් විසින් බිඳ හෙලුවා.
ඉන් අනතුරුව සිය පළමු ඉනිමට පිතිකරණය ඇරඹි ඉන්දීය කණ්ඩායමේ නායක ශර්මා ලකුණු 03ක් ලබා සිටිය දී පළමු කඩුල්ල ලෙස අද දිනයේ දී දැවී ගියා.
පෙර තරගයේ දී අසාර්ථක වූ ජයිස්වාල් ලකුණු 82ක් ලබා ගත්තා.
විරාට් කෝලි ලකුණු 36කටත්, කේ. එල් රාහුල් ලකුණු 24කටත් දැවී ගියා.
පැට් කමින්ස් සහ ස්කොට්‍ බෝලන්ඩ් කඩුලු 02ක බැගින් බිඳ දැමුවා.
හෙට (28) තරගයේ තෙවැනි දිනයයි.
