රිටිගල රක්ෂිතයේ සැරිසරන මුවන් හා වනසතුන් දඩයම් කර මස් සඳහා අලෙවි කරනු ලබන ජාවාරමක් පිළිබඳ ව ගනේවල්පොල වනජීවි කාර්යාලයට ලද තොරතුරකට අනුව සිදු කරන ලද වැටලීමක දී මුවමස් සමග පුද්ගලයින් දෙදෙනකු අත්අඩංගුවට ගැනීමට හැකිව තිබෙනවා.
අප ප්‍රාදේශීය වාර්තාකරු පැවසුවේ මෙම සැකකරුවන් සන්තකයේ තිබී විකිණීමට සූදානම් කර තිබූ මුවමස් කිලෝග්‍රෑම් 40ක් සොයා ගැනුණු බවයි.
සැකකරුවන් විකිණීම සඳහා දඩයම් කළ මුවාගේ හිස සහිත අං යුගල හා “මුවහම” ද සොයා ගැනුණු බවයි වාර්තා වන්නේ.
මෙලෙස අත්අඩංගුවට ගෙන ඇත්තේ වැලිමඩ හා මැදවච්චිය ප්‍රදේශයන් හි පදිංචිකරුවන් දෙදෙනෙක්.
ඔවුන් ගනේවල්පොල ප්‍රදේශයේ වැඩබිමක කොන්ත්‍රාත් සේවකයින් දෙදෙනෙකු ලෙස සේවය කරමින් සිටින අතර මෙම දඩමස් ජාවාරමේ නියැලී ඇති බවයි වනජීවි නිලධාරීන් පැවසුවේ.
එම මස් තොගය සමග සැකකරුවන්, කැකිරාව මහේස්ත්‍රාත් අධිකරණයට ඉදිරිපත් කිරීමෙන් අනතුරුව මේ මස 14 වන දින දක්වා රක්ෂිතය බන්ධනාගාරගත කිරීමට කටයුතු කර තිබෙනවා.
