මීගොඩ ආර්ථිකේ කොල්ලයේ මහ මොළකරු සහ වෙඩික්කරු අල්ලයි

මීගොඩ ආර්ථික මධ්‍යස්ථානයේ තොග වෙළඳසැලක සේවිකාවකට වෙඩිතබා එහි තිබූ මුදල් කොල්ලකෑමේ සිද්ධියේ මහමොළකරු අත්අඩංගුවට ගෙන තිබෙනවා.

මෙම සැකකරු හම්බන්තොට ප්‍රදේශයේ සැඟව සිටිය දී අත්අඩංගුවට ගෙන ඇති බවයි වාර්තා වුණේ.

මේ අතර කොල්ලකෑම සිදුකල අවස්ථාවේ දී වෙළඳසැලේ සේවිකාවට වෙඩි තැබූ වෙඩික්කරු ගොඩකවෙල ප්‍රදේශයේ සැඟව සිටිය දී අත්අඩංගුවට ගෙන තිබෙනවා.

අපරාධ සඳහා යොදාගත් යතුරුපැදිය සහ ගිනිඅවිය ද පොලිස් විශේෂ කාර්ය බලකාය විසින් අද (18) දිනයේ සොයාගත් බවයි පොලිසිය පැවසුවේ.

මේ අතර මෙම අපරාධය සඳහා ආධාර අනුබල දුන් සැකකරුවන් දෙදෙනෙක් ද ඊයේ (17) කඩවත සහ ඉඹුල්ගම යන ප්‍රදේශවල දී අත්අඩංගුවට ගෙන තිබුණා.

මෙලෙස අත්අඩංගුවට ගැනුණු සැකකරුවන් දෙදෙනාගෙන් එක් අයෙක් ව්‍යාපාරිකයෙක් බවයි පොලිසිය සඳහන් කළේ.

මොවුන් දෙදෙනා 39 සහ 44 යන වයස්වල පසුවන්නන් දෙදෙනෙක්.

පසුගිය 12 වනදා අලුයම් කාලයේ මීගොඩ ආර්ථික මධ්‍යස්ථානයේ පිහිටි තොග වෙළඳසැලක පැමිණි වෙඩිකරුවන් දෙදෙනෙක් එහි සේවය කළ 23 හැවිරිදි තරුණියකට වෙඩි තබා රුපියල් පනස් දහසකට ආසන්න මුදලක් කොල්ල කා යතුරුපැදියකින් පළාගොස් තිබුණා.

එහිදී උදරයට වෙඩි ප්‍රහාර තුනක් එල්ල වී තිබූ තරුණිය ප්‍රතිකාර සඳහා හෝමාගම මූලික රෝහලට ඇතුළත් කෙරුණා.