මියන්මාරයේ පසුගිය සිකුරාදා (28) සිදු වූ ද්විත්ව භූ කම්පනයට හසු වූ එරට වැසියන් මුදා ගැනීමේ මෙහෙයුම් තවදුරටත් ක්‍රියාත්මක කර තිබෙනවා.
ඊට ඉන්දීය ආරක්ෂක අංශයන්ගේ සේවය ද හිමි ව ඇති අතර ‘බ්‍රහ්ම’ මෙහෙයුම යටතේ මෙම ගලවාගැනීමේ ක්‍රියාවලිය සිදු වනු ඇති.
මියන්මාර ඉන්දීය තානාපති කාර්‍යාලය පැවසුවේ විපතට පත් වූ මියන්මාර වැසියන්ගේ ජීවිත ගලවා ගැනීම සඳහා ඉන්දීය හමුදාවන් දැඩි පරිශ්‍රමයක් දරන බවයි.
එමෙන්ම නරේන්ද්‍ර මෝදිගේ අනුදැනුම සහ උපදෙස් මත මානුෂීය ආධාර ද මියන්මාරය වෙත යවා තිබෙනවා.
මියන්මාරයේ ඉන්දීය තානාපති කාර්‍යාලය නිවේදනයක් නිකුත් කරමින් සඳහන් කර ඇත්තේ; “බ්‍රහ්ම මෙහෙයුම – මැන්ඩලේ හි භූමිකම්පා ස්ථාන වෙත පැමිණි දා සිට, දිවි ගලවා ගත් අය සෙවීම සඳහා සහ වෛද්‍ය සහාය ලබාදීමට අපගේ කණ්ඩායම් කටයුතු කරමින් සිටී. තවත් ආධාර පැමිණෙමින් තිබේ. අපගේ හදවත් සසැම විටම ආපදාවට ලක්වූවන් සමගයි..” යනුවෙන්.
මියන්මාරයට සහ තායිලන්තයට බලපෑ දැවැන්ත භූමිකම්පාවෙන් සිදු වූ මරණ සංඛ්‍යාව දෙරට තුළ ම ඉහළ ගිය අතර මියන්මාරයේ මේ වන විට පුද්ගලයින් 1,700ක් පමණ මිය ගොස් ඇති බව තහවුරු වී තිබෙනවා.
පාලක ජුන්ටාවට අනුව, 3,400ක් පමණ තුවාල ලබා ඇති අතර තවත් 300 ක් පමණ අතුරුදන් වී ඇති බවයි පැවසෙන්නේ.
