මිද්දෙණිය පොලිස් වසම තුළ ඉකුත් පෙබරවාරි මස 18 වැනි දින සිදු කර තිබූ ත්‍රිත්ත්ව මනුෂ්‍ය ඝාතනයට අදාළ අත්‍යවශ්‍ය සැකකරුවෙකු ඊයේ (12) දින රාත්‍රී ඩුබායි බලා පලා යාමට කටුනායක ගුවන් තොටුපොළ වෙත පැමිණ සිටියදී , ගුවන් තොටුපොළ අපරාධ පරීක්ෂණ දෙපාර්තමේන්තු නිලධාරීන් විසින් අත්අඅඩංගුවට ගෙන තිබෙනවා.
දසත ප්‍රාදේශීය වාර්තාකරු පැවසුවේ මොහු කටුවන, අගුලන්දෙණිය ප්‍රදේශයේ පදිංචි දොරේමුරේ බඩලගේ පසිදු සංජන නමැති 23 හැවිරිදි තරුණයෙක් බවයි.
සැකකරු ඊයේ රාත්‍රී 08.15ට ඩුබායි බලා පිටත්ව ගිය එමිරේට්ස් ගුවන් සේවයේ ඊ.කේ.- 653 දරන ගුවන් යානයට පිවිසීමට කටුනායක ගුවන් තොටුපොළ වෙත පැමිණ තිබුණා.
කටුනායක ගුවන් තොටුපොළ අපරාධ පරීක්ෂණ දෙපාර්තමේන්තු නිලධාරීන් විසින් මොහු අත්අඩංගුවට ගැනීමෙන් පසු, මිද්දෙණිය පොලිසියේ විශේෂ නිලධාරීන් පිරිසක් ගුවන් තොටුපොළ වෙත පැමිණ මෙම සැකකරු ඉදිරි විමර්ශන කටයුතු සඳහා රැගෙන ගිය බවයි වාර්තා වන්නේ.
