මැතිව්ස් ශ්‍රී ලංකා කණ්ඩායම වෙනුවෙන් රටෙන්ම සමාව ඉල්ලයි

ඉතිහාසයේ පළමු වරට පන්දුවාර 20-20 ලෝක කුසලාන තරගාවලියක මූලික වටයෙන් ඉවතට විසි වූ ශ්‍රී ලංකා කණ්ඩායම සහභාගී වන මූලික වටයේ අවසන් තරගය හෙට (17) නෙදර්ලන්තය සමඟ පැවැත්වෙනවා.

බටහිර ඉන්දීය කොදෙව් දූපත් හි සාන්ත ලුසියා හිදී පැවැත්වෙන මෙම තරග ආරම්භ වන්නේ පෙරවරු 6.00ටයි.

ශ්‍රී ලංකා කණ්ඩායම මූලික වටයේ සහභාගී වූ තරග තුනෙන් තරග දෙකක් පරාජයට පත් වූ අතර, නේපාලය අතර පැවත්වීමට නියමිතව තිබූ තුන්වන තරගය වර්ෂාවට සේදී ගියා.

එවන් තත්ත්වයක් හමුවේ ‘ඩී’ කාණ්ඩයේ අවසන් ස්ථානයේ පසුවන ශ්‍රී ලංකාව හෙට නෙදර්ලන්තය සමඟ තරගයට පිවිසෙන්නේ අයි.සී.සීයේ පූර්ණ සාමාජික රටක් ලෙස අවමානයෙන් ගැලවීම සඳහායි.

මේ අතර රටේ බලාපොරාත්තු ඉටු කිරීමට නොහැකිවීම ගැන ශ්‍රී ලංකා ක්‍රිකට් හිටපු නායක ඇන්ජලෝ මැතිව්ස් සිය කණ්ඩායම වෙනුවෙන් සමාව ඉල්ලා සිටියා.

ලෝක කුසලාන තරගාවලියේ ලද අවමන් සහගත පරාජය සමබන්ධයෙන්, සාන්ත ලුසියා හිදී මාධ්‍ය හමුවේ කරුණු දක්වමින් මැතිව්ස් පැවසුවේ තරගාවලිය තුළ කණ්ඩායම ක්‍රීඩා කළ ආකාරය සම්බන්ධයෙන් කිසිසේත් පැහැදීමක් නොමැති බවයි.