හෙට (14) දින පැවැත්වීමට නියමිත පාර්ලිමේන්තු මහමැතිවරණය සඳහා මැතිවරණ පොලිස්පති අණදෙන විශේෂ නිරීක්ෂණ මැදිරියක් ස්ථාපිත කර තිබෙනවා.
අද (13) පැවති විශේෂ මාධ්‍ය සාකච්ඡාවකට එක්වෙමින් පොලිස් මාධ්‍ය ප්‍රකාශක ජ්‍යේෂ්ඨ නියෝජ්‍ය පොලිස්පති නීතිඥ නිහාල් තල්දූව මහතා පැවසුවේ; වැඩබලන පොලිස්පති ප්‍රියන්ත වීරසූරිය මහතාගේ අධීක්ෂණය සහ උපදෙස් මත මෙම ඒකකය පිහිටුවා ඇති බවයි.
මෙම නිරීක්ෂණ මැදිරිය ශ්‍රී ලංකා පොලිස් මූලස්ථානයේ පිහිටුවා තිබෙනවා.
මෙහි රාජකාරි කටයුතු සඳහා ත්‍රිවිධ හමුදා නිලධාරින් හා පොලිස් විශේෂ කාර්‍යය බලකා නිලධාරීන්, කැරලි මර්දන ඒකකයේ නිලධාරින් ඇතුළු ආරක්ෂක අංශයේ පිරිසක් රාජකාරියේ යොදා තිබෙන බවත් වාර්තා වනවා.
ඩ්‍රෝන් කැමරා, සීසීටීවී, ජංගම සීසීටීවී රථ යොදවා ඇති අතර ඒවා නිරික්ෂණය කිරීම ඔවුන්ගේ රාජකාරියයි.
මැතිවරණ නිරීක්ෂණය සඳහා යොදවා තිබෙන ජංගම සංචාර නිරීක්ෂණය කර ඒවායේ තොරතුරු ලබා ගනිමින් ආරක්ෂක තත්ත්වය යාවත්කාලීන කිරීමට ද ඔවුන් ක්‍රියා කරනු ඇති.
