ජනාධිපතිවරණයට ඉදිරිපත් වන අපේක්ෂකයන්ගේ ආරක්ෂාව පිළිබඳ ව කමිටුවක නිර්දේශ මත කටයුතු සිදු කරන බව පොලිස් මූලස්ථානය පවසනවා.
අද (02) පස්වරුවේ පැවති මාධ්‍ය හමුවකට එක්වෙමින් පොලිස් මාධ්‍ය ප්‍රකාශක නියෝජ්‍ය පොලිස්පති නීතිඥ නිහාල් තල්දුව පැවසුවේ; කැබිනට් මණ්ඩලයේ පූර්ණ අනුමැතියකින් යුතුව ජනාධිපති අපේක්ෂකයින්ගේ ආරක්ෂාව තහවුරු කිරීම වෙනුවෙන් කමිටුවක් පත් කර ඇති බවයි.
එම කමිටුවට උපදෙස් ලබාදීම, අධීක්ෂණය සිදු කිරීම ආදිය මහජන ආරක්ෂක අමාත්‍යාංශයේ ලේකම්වරයාගේ ප්‍රධානත්වයෙන් සිදු කෙරෙන බව ද පොලිස් මාධ්‍ය ප්‍රකාශකවරයා පැවසුවා.
එමෙන්ම අනිද්දා (04) දින සිට තැපැල් ඡන්ද සලකුණු කිරීමේ කටයුතු ආරම්භ වන බැවින්, දිවයින පුරා සෑම පොලිස් ස්ථානයක ම වෙන ම ඒකකයක් මැතිවරණ පැමිණිලි ලබා ගැනීම් සහ ඒ සම්බන්ධව ක්‍රියා කිරීම් වෙනුවෙන් පත් කර ඇති බවත් මැතිවරණ පනත ප්‍රකාරව පොලිසිය කටයුතු කරන ආකාරය පිළිබඳ ව ද පොලිස් මාධ්‍ය ප්‍රකාශක නිහාල් තල්දූව මහතා මෙහිදී වැඩිදුරටත් අදහස් දැක්වූවා.
මේ වනවිට මැතිවරණයට අදාළ ව පැමිණිලි 144ක් පොලිසියට ලැබී ඇති බවත්; පුද්ගලයින් 22 දෙදෙනකු අත් අඩංගුවට ගෙන ඇති බව ද මෙහිදී අනාවරණය වූ අතර; මැතිවරණ ප්‍රචාරක පුවරු ලක්ෂ 02ක් කම්කරුවන් ලබා ඉවත් කිරීමට පොලිසිය විසින් කටයුතු කරනු ලැබූ බවයි පොලිසිය පැවසුවේ.
මේ අතර වාහනවල මැතිවරණයට අදාළ ස්ටිකර්ස්, පෝස්ටර්ස් ප්‍රදර්ශනය පිළිබඳ ව ද මාධ්‍ය හමුවේ දී මහජනතාව දැනුවත් කෙරුණා.
එවැනි වාහන අනිවාර්‍යයෙන්ම නවතා අදාළ ප්‍රචාරණ පුවරු හෝ ස්ටිකර්ස් ඉවත් කිරීමට පොලිස් නිලධාරීන් වෙත උපදෙස් ලබා දී ඇති බවයි සඳහන් වන්නේ.
මැතිවරණ කාල සීමාවේ දී උපරිම සාමය පවත්වාගෙන යාමට කටයුතු කරන අතර; කිසිවෙකු ප්‍රචණ්ඩකාරී හෝ මැතිවරණ නීති උල්ලංඝනය කිරීමක් සිදු කළහොත් නීතිය දැඩි ව ක්‍රියාත්මක කරන බව ද පොලිස් මාධ්‍ය ප්‍රකාශකවරයා මෙහිදී වැඩිදුරටත් අදහස් දක්වමින් කියා සිටියා.
