මීගමුව රෝහලේ බාහිර රෝගී අංශයෙන් (OPD) දිනපතා ප්රතිකාර ලබාගැනීමට පැමිණෙන සියදහස් ගණනින් යුත් රෝගී ජනතාවට මෙතෙක් කලක් මහත් අඩුපාඩුවක්ව පවතින ‘නිදහස් විවේක කලාපයක්’ නිර්මාණය කරදීමට, මීගමුව මාරිස්ටෙල්ලා විද්යාලයේ 1989 ආදි ශිෂ්ය කණ්ඩායම වැඩ කටයුතු ආරම්භ කර තිබෙනවා.
ඉතා නුදුරේදීම මීගමු රෝහලේ ස්ථාපිතවන “ගරු ක්ලින්ටන් සහෝදර විවේකී සෙවන” නමින් නම් කර ඇති මෙම නිදහස් විවේකී කලාපය නිර්මාණය කර ස්ථාපිත කිරීම වෙනුවෙන් වන සමාරම්භක උත්සවය පසුගිය 07 වන දින පස්වරුවේ මීගමුව මාරිස්ටෙල්ලා විද්යාලයේදී පැවැත් වුණා.
ඒ, අනුව මීගමුව රෝහලේ පහත මාලයේ දිගින් හා පළලින් අඩි 25ක් පමණවන එනම් වර්ග අඩි 625 ක පමණ වපසරියකින් සමන්විත වන මෙම කලාපය තුළ සුවපහසු ආසන 135ක් , විදුලි පංකා කිහිපයක්, පානය කිරීමට පිරිසිදු ජලය සකසන සහ එම පිරිසිදු ජලය ගබඩා කොට තැබෙන යන්ත්ර කිහිපයක්, පුළුල් තිර රූපවාහිනී යන්ත්ර 02ක් , එලෙසම බාහිර රෝගී අංශයේ වෛද්යවරුන් මුණගැසීමට ස්වයංක්රීයව අංකයන් ලබාදීමේ ක්රමවේදයක් සහ තමන්ට හිමි වී ඇති අංකය ප්රදර්ශනය කෙරෙන ඩිජිටල් අංක පුවරුවක්ද තවද විවේකීව සිට කියවීමට හරවත් කරුණු කාරණා අඩංගු පොත්පත් සඟරා ආදිය ඇති ස්ථානයක් මෙන්ම කුඩා දරුවනට මව්කිරි ලබාදීම සඳහා විශේෂිතව සකසන ලද වෙනම ම ස්ථානයක් ඇතුළු තවත් බොහෝ නවීන සහ තාක්ෂණික පහසුකම්වලින් මෙම කලාපය සමන්විත වනවා.
මෙම ව්යාපෘතිය සඳහා රුපියල් මිලියන 07 කට අධික මුදලක් වැය වන බවට මේ වනවිට ඇස්තමේන්තු කර තිබෙනවා.
මාරිස්ටෙල්ලා විද්යාලීය 1989 ආදි ශිෂ්ය කණ්ඩායම මෙම ව්යාපෘතිය සඳහා එම විද්යාලයේ වර්ෂ1979 -1989 දශකය තුළ එම විද්යාලයේ විදුහල්පති ධුරය දැරූ ගරු ක්ලින්ටන් පෙරේරා සහෝදරතුමාගේ නමින් විශේෂිත අරමුදලක් ද පිහිටුවාතිබෙනවා.
මේ වන විට 85 වන වියේ පසුවන එතුමන් රෝගාතුරව කල් ගෙවන අතර, මෙහිදී මෙම සමාරම්භක නිල උත්සවයට පෙරාතුව මාරිස්ටෙල්ලා විද්යාලයේ විශ්රාමික හිටපු විදුහල්පති ගරු ක්ලින්ටන් පෙරේරා සහෝදරතුමන්ට සුවය සහ ශාන්තිය පතමින් විශේෂ අසිරි දිව්ය මෙහෙයක් ද පැවැත් වුණා.
එම දිව්ය මෙහෙය පවත්වනු ලැබුවේ, සීදූව “සුපුවත් අරණ” දෙව්මැදුරේ, අධ්යක්ෂක සහ මාරිස්ටෙල්ලා විද්යාලීය ආදි ශිෂ්යයකුවන ගරු ඩැරල් කූඤ්ඤ පියතුමන් විසින්.
මෙම සමාරම්භක උත්සවය සඳහා මාරිස් නිකායේ දකුණු ආසියානු ප්රාදේශියාධිපති නික්ලස් ප්රනාන්දු, මාරිස් නිකායේ සහායක භාණ්ඩාගාරික චාමර හෙට්ටිආරච්චි සහ එම විද්යාලීය ප්රාථමික අංශයේ හිටපු විදුහල්පති සේල්ස් ප්රනාන්දු යන ගරු සහෝදරුතුමන්ලා ද ගරු ක්ලින්ටන් පෙරේරා සහෝදරතුමන්ගේ ඥාතීන් පිරිසක් ඇතුළුව තවත් ආරාධිත අමුත්තන් පිරිසක් ද සහභාගීව සිටියා.
