මහජන ආරක්ෂක අමාත්ය ආනන්ද විජේපාල මහතාගේ පාර්ලිමේන්තු මන්ත්රී ධුරය බල රහිත කිරීමේ නියෝගයක් නිකුත් කරන ලෙස ඉල්ලා ගොනුකර තිබෙන පෙත්සමට එරෙහිව ඉදිරිපත් කර තිබෙන මූලික විරෝධතා පිළිබඳ නියෝගය මැයි මස 05 ප්රකාශයට පත්කරන බව අභියාචනාධිකරණය අද (18) නියෝග කළා.
මෙම පෙත්සම අද අභියාචනාධිකරණයේ වැඩ බලන සභාපති විනිසුරු මොහොමඩ් ලෆාර් තාහීර් සහ කේ.පී.ප්රනාන්දු යන මහත්වරුන්ගෙන් සමන්විත අභියාචනාධිකරණ විනිසුරු මඬුල්ල ඉදිරියේ කැඳවනු ලැබුවා.
එහිදී මෙම සිද්ධියට අදාළ ලිඛිත දේශන ඉදිරිපත් කිරීම සඳහා පාර්ශ්වකරුවන්ට විනිසුරු මඬුල්ල විසින් සතියක කාලයක් ලබා දෙනු ලැබුවා.
ඉන් අනතුරුව මෙම පෙත්සම ඉදිරියට පවත්වාගෙන යාමට නොහැකි බවට නීතිපතිවරයා ඇතුළු වග උත්තරකරුවන් විසින් මතු කළ මූලික විරෝධතා පිළිබඳ නියෝගය මැයි මස 05 වනදා ප්රකාශයට පත් කරන කළ බවත් විනිසුරු මඬුල්ල නියම කළා.
ශ්රී ලංකා පොදු ජන පෙරමුණේ පාලක ලේකම් රේණුක පෙරේරා මහතා විසින් මෙම පෙත්සම ඉදිරිපත් කළා.
පෙත්සම්කරු කියා සිටින්නේ මහජන ආරක්ෂක අමාත්ය ආනන්ද විජේපාල මහතා පාර්ලිමේන්තු මන්ත්රීවරයෙකු වශයෙන් කටයුතු කරමින් ජනාධිපතිවරයාගේ කාර්ය මණ්ඩල ප්රධානියා වශයෙන් ද කටයුතු කරන බවට තොරතුරු අනාවරණය වී ඇති බවයි.
ජනාධිපති කාර්ය මණ්ඩල ප්රධානියා යනු රාජ්ය තනතුරක් යැයි පෙන්වා දෙන පෙත්සම්කරු පාර්ලිමේන්තු මන්ත්රී ධුරය දරමින් එවැනි රාජ්ය තනතුරක් දැරීම ආණ්ඩුක්රම ව්යවස්ථාව යටතේ පාර්ලිමේන්තු මන්ත්රී ධුරය දැරීමට නුසුදුසුකමක් බවත් පෙත්සම්කරු චෝදනා කළා.
ඒ අනුව ආනන්ද විජේපාල මහතා පාර්ලිමේන්තු මන්ත්රී ධුරය දැරීමට නුසුදුසු පුද්ගලයෙකු යැයි තීන්දුකොට ඔහුගේ මන්ත්රී ධුරය බල රහිත බවට නියෝගයක් නිකුත් කරන ලෙසත් පෙත්සම්කරු අභියාචනාධිකරණයෙන් වැඩිදුරටත් ඉල්ලා තිබෙනවා.
wpDiscuz
