දේශීය මත්පැන්වල යූරියා අඩංගු බවට කළ ප්‍රකාශයක් සම්බන්ධයෙන් අපරාධ පරීක්ෂණ දෙපාර්තමේන්තුවට පැමිණිල්ලක් ඉදිරිපත් වී තිබෙනවා.
මගෙන් රටට සංවිධානයේ සභාපති සංජය මහවත්ත විසිනුයි අද මෙම පැමිණිල්ල ඉදිරිපත් කර ඇත්තේ.
දර්ශන තන්ත්‍රිගේ නැමැති සමාජ ක්‍රියාකාරිකයෙකු ප්‍රසිද්ධ සමාජ මාධ්‍යයක් ඔස්සේ මත්පැන්වල යූරියා අඩංගු වී ඇති බවට ප්‍රකාශයක් සිදු කර ඇතැයි පැමිණිලිකරු පෙන්වා දෙනවා. ඔහු චෝදනා කරන්නේ අදාළ ප්‍රකාශය ඉතා බරපතල ප්‍රකාශයක් බවයි.
මත්පැන්වල යූරියා අඩංගු වී ඇත් නම් ඒවා පාරිභෝගිකයන්ට ඉතා අහිතකර බලපෑම් ඇති කරන බවත් මේ පිළිබඳව සුරාබදු දෙපාර්තමේන්තුව වහාම පරීක්ෂණයක් ආරම්භ කළ යුතු බව පැමිණිලිකරු පෙන්වා දෙනවා.
එසේ නොමැතිව සාවද්‍ය තොරතුරු මත පදනම්ව මෙවැනි ප්‍රකාශයක් කර තිබේ නම් එම පුද්ගලයා පිළිබඳ වහාම පරීක්ෂණයක් ආරම්භ කර එයට හේතුව සොයා බැලිය යුතු බවයි සංජය මහවත්ත මාධ්‍ය වෙත කියා සිටියේ.
මෙම තොරතුර ලක්ෂ ගණනක පිරිසක් නරඹා ඇති අතර මේ පිළිබඳ වහාම පුළුල් පරීක්ෂණ ආරම්භ කළ යුතු බව ද ඔහු මෙහිදී ප්‍රකාශ කළා.
