බොලිවුඩ් රංගන ශිල්පී සුෂාන්ත් සිං රාජ්පුත් අභිරහස් ලෙස මියයාමේ නඩුව වසා දැමීමේ වාර්තාවක් ගොනු කර ඇති බව ඉන්දීය මාධ්‍ය වාර්තා කරනවා.
විමර්ශන අරඹා වසර හතරකට වැඩි කාලයක් ගත වී ඇති පසුබිමක ඉන්දීය මධ්‍යම විමර්ශන කාර්යාංශය විසින් මෙම නඩුව වසා දැමීමට තීරණය කර ඇති බවයි වාර්තා වන්නේ.
බොලිවුඩ් නළු සුෂාන්ත් සිං ගේ මරණය සම්බන්ධයෙන් සිදුකළ විමර්ශන වල දී අනාවරණය වූ කරුණු මත, ඔහුට සියදිවි නසා ගැනීමට අනුබල දීමක් ඔ පෙළඹවීමක් සිදුව නොමැති බවයි අනාවරණය වී ඇත්තේ.
ඒ, අනුවයි මෙම නඩු කටයුත්ත වසා දැමීමට වාර්තාවක් ගොනුකර ඇත්තේ.
34 හැවිරිදි සුෂාන්ත් සිං රාජ්පුත් 2020 ජුනි 14 වන දින මුම්බායි හි බන්ඩ්‍රා හි ඔහුගේ මහල් නිවාසයේ එල්ලී සිටිය දී සොයාගත් අතර, එහිදී චෝදනා කර සිටියේ ඔහුට සියදිවි නසා ගැනීමට පෙළඹවීමක් සිදුකර ඇති බවයි.
සුෂාන්ත් රාජ්පුත්ගේ පියා විසින් සුෂාන්ත්ගේ එවකට පෙම්වතිය වන නිළි රියා චක්‍රබෝර්තිට සහ ඇයගේ පවුලට එරෙහිව 2020 අගෝස්තු මාසයේදී නඩුවක් ගොනු කළේ තම පුත්‍රයාගේ මරණයට ඔවුන් වගකිව යුතු බව පවසමින්.
කෙසේ වෙතත් සුෂාන්ත් රාජ්පුත් සියදිවි නසා ගැනීමට රියා චක්‍රබෝර්ති සහ ඇගේ පවුලේ අය සම්බන්ධ කිසිඳු සාක්ෂියක් හමු නොවූ බවයි ඉන්දීය මධ්‍යම විමර්ශන කාර්යාංශය සඳහන් කළේ.
ඒ, අනුව රියා චක්‍රබෝර්ති, ඇගේ දෙමාපියන් සහ සහෝදරයා ඇතුළු නඩුවේ ගොනු කර ඇති පෙත්සම් දෙකෙහි නම් කර ඇති සියලු දෙනා නිදහස් කළ බව ද එම කාර්යාංශය පවසනවා.
එමෙන්ම ඉන්දීය වෛද්‍ය විද්‍යා ආයතනයේ අධිකරණ වෛද්‍ය කණ්ඩායමක් ප්‍රකාශ කර තිබුණේ සුෂාන්ත් රාජ්පුත් ඝාතනය කර නොමැති බවත් එය සියදිවි නසාගැනීමෙන් සිදු වූ මරණයක් බවයි.
මෙම නඩුව වසා දැමීමේ වාර්තාව ඉදිරිපත් කිරීමෙන් පසු, බන්ද්‍රා මහේස්ත්‍රාත් අධිකරණය විසින් ඊළඟ නඩු විභාගය අප්‍රේල් 8 වන දින කැඳවීමට නියමිතව තිබෙනවා.
