එකම පවුලේ සාමාජිකයින් රැගත් වෑන් රථයක් අනතුරකට ලක්වීමෙන් එහි ගමන් කළ දෙදෙනකු ජීවිතක්ෂයට පත් ව තවත් 12 දෙනෙකු බරපතළ තුවාල ලබා රෝහල්ගත කර තිබෙනවා.
අද (31) පස්වරුවේ මෙම අනතුර සිදු ව ඇත්තේ හපුතලේ – බෙරගල මාර්ගයේ විහාරගල තේ කර්මාන්තශාලාව අසල දී බවයි දසත ප්රාදේශීය වාර්තාකරු පැවසුවේ.
මෙම පිරිස අනුරාධපුරයේ සංචාරය කර නැවත සිය නිවෙස් පිහිටි හොරණ – රැටියල ප්රදේශය බලා ගමන් කරමින් සිට තිබෙනවා.
එක් වරම වෑන් රථය රියදුරුට පාලනය කරගත නොහැකි ව එම රථය මාර්ගයේ අසල පිහිටි ගල් කණ්ඩියක ගැටී ඇති බවයි වාර්තාකරු පැවසුවේ.
අනතුර සිදුවන අවස්ථාවේ දී වෑන් රියෙහි පුද්ගලයින් 15 දෙනෙකු ගමන් කරමින් සිට තිබෙනවා.
ඉන් දෙදෙනකු එම ස්ථානයේ දී ම මියගොස් ඇති බවත් කුඩා දරුවෙකු හැර අනිත් සියලු දෙනා තුවාල ලබා හපුතලේ මූලික රෝහලට ඇතුළත් කර ඇති බවත් සඳහන්.
තුවාලකරුවන් අතරින් 08 දෙනෙකුගේ තත්ත්වය අසාධ්යය බවටයි වාර්තා වූයේ.
සිද්ධිය සම්බන්ධයෙන් හපුතලේ පොලිසිය වැඩිදුර විමර්ශන සිදු කරනවා.
