මොනරාගල – බුදුරුවගල මහා විද්‍යාලීය ශිෂ්‍ය පාර්ලිමේන්තුව ජනාධිපති රනිල් වික්‍රමසිංහගේ ප්‍රධානත්වයෙන් පැවැත්වුණා.
ඒ පසුගියදා (17) ජනාධිපති ලේකම් කාර්යාලයේ දී යි.
මෙම අවස්ථාවට ජනාධිපති ලේකම් සමන් ඒකනායක, පාර්ලිමේන්තුවේ මහලේකම් කුෂානි රෝහණදීර, පාර්ලිමේන්තුවේ කාර්ය මණ්ඩල ප්‍රධානී සහ නියෝජ්‍ය මහලේකම් චමින්ද කුලරත්න, පාර්ලිමේන්තුවේ සහකාර මහලේකම් හංස අබේරත්න ඇතුළු පිරිසක් ද එක් ව සිටියා.
සභාව අමතමින් ජනාධිපතිවරයා පැරණි පාර්ලිමේන්තු ගොඩනැගිල්ලේ විශිෂ්ට ඉතිහාසය සහ පාර්ලිමේන්තු ක්‍රමයේ විකාශනය පැමිණ සිටි තරුණ සිසුන්ට විස්තර කළා.
සිසු දරු දැරියන් අමතමින් පාර්ලිමේන්තුවේ මහලේකම් කුෂානි රෝහණදීර මහත්මිය පාර්ලිමේන්තු ක්‍රියාවලිය පිළිබඳ හඳුන්වාදීමක් සිදු කළ අතර පාසල් දරුවන් පාර්ලිමේන්තු ක්‍රමය පිළිබඳ ව දැනුවත් කිරීමට අමතර ව ජනාධිපතිවරයාගේ සංකල්පයකට අනුව අනාගත සිසු පරපුර අතර සමගිය, සහයෝගීතාව වර්ධනය කිරීමේ අරමුණින් ශිෂ්‍ය පාර්ලිමේන්තු වඩාත් සක්‍රීය ලෙස ක්‍රියාත්මක වන බව මහලේකම්වරිය අවධාරණය කිරීම ද මෙහිදී සිදුවුණා.
පාර්ලිමේන්තුව පුරවැසියන් සමග සම්බන්ධ කරමින් මහජනතාව සහ පාර්ලිමේන්තුව එකිනෙකාට සමීප කිරීමට මෙම සියලු ක්‍රියාමාර්ග ගන්නා බව ඇය වැඩිදුරටත් පෙන්වා දුන්නා.
