සෑම කෙනෙකුටම අවස්ථාවන්ගෙන් පිරුණු යහපත් පරිසරයක් නිර්මාණය කරමින් රට වර්තමානයේ මුහුණ දී සිටින බුද්ධි ගලනය නැවැත්වීමට සෑම උත්සාහයක්ම ගන්නා බව නියෝජ්‍ය ආරක්‍ෂක අමාත්‍ය විශ්‍රාමික මේජර් ජෙනරල් අරුණ ජයසේකර පවසනවා.
ඒ, සඳහා වත්මන් රජය අධ්‍යාපනයට ප්‍රමුඛස්ථානයක් දී ඇති බවයි රාජ්‍ය අමාත්‍යවරයා පැවසුවේ.
රත්මලාන ජෙනරාල් ශ්‍රීමත් ජෝන් කොතලාවල ආරක්‍ෂක විශ්වවිද්‍යාලයේ සංචාරයකට ඊයේ (09) පැමිණි අවස්ථාවේ දී ඔහු මේ බව සඳහන් කර සිටියේ.
විනය සහ යහපත් හැසිරීම පවත්වා ගනිමින් තරුණ පරපුරට දැනුම සහ කුසලතා පදනම් කරගත් අධ්‍යාපනය ලබාදීමේ වැදගත්කම ඔහු මෙහිදී අවධාරණය කළා.
ජීවිතයේ සෑම ක්ෂේත්‍රයකම පාලනයක් හා විනයගරුක ප්‍රවේශයක් තුළින් නීතියේ ආධිපත්‍යය ක්‍රියාත්මක කිරීමට හැකිවන බව ද නියෝජ්‍ය අමාත්‍යවරයා වැඩිදුරටත් සඳහන් කර සිටියා.
එමෙන්ම සෑම කෙනෙකුම වගකීමෙන් කටයුතු කරන සමාජයක් තුළ නීතියේ ආධිපත්‍යය තහවුරු කරන ලෙස ඔහු ඉල්ලා සිටියා.
නියෝජ්‍ය අමාත්‍යවරයා මෙහිදී තරුණ උපාධි අපේක්‍ෂකයින්ගෙන් ඉල්ලා සිටියේ ජෙනරාල් ශ්‍රීමත් ජෝන් කොතලාවල ආරක්‍ෂක විශ්වවිද්‍යාලය වෙතින් ලබාගත හැකි අධ්‍යාපනය හොඳින් ලබාගෙන රටේ සංවර්ධනයට දායකවන ලෙසයි.
