තම බිරිඳ මියගොස් ඇති බවට බොරුවක් පවසා මල්ශාලාවකින් මිනී පෙට්ටියක්, මිනී ඇඳුම්, මල්වඩමක් සහ අනෙකුත් අවමංගල්ය භාණ්ඩ නිවසට රැගෙන ගිය පුද්ගලයෙක් පිළිබඳ පුවතක් බලංගොඩ ප්රදේශයෙන් වාර්තා වනවා.
මෙම පුද්ගලයා විසින් මල්ශාලාවේ සේවකයින්ට මෙලෙස බොරුවක් පවසා ඊයේ (25) රාත්රියේ මෙම අවමංගල්ය භාණ්ඩ නිවසට රැගෙන ගොස් ඇති බවයි වාර්තා වන්නේ.
එහිදී මොහු විසින් රෝගාතුරව සිටි තම බිරිඳ මියගිය බවත් මරණ පරීක්ෂකවරයා ඇතුළු නිලධාරීන් ඒ බව තහවුරු කළ බවත් මල්ශාලා සේවකයින්ට පවසා තිබෙනවා.
ඒ, අනුව මිනී පෙට්ටිය ඇතුළු අවමංගල්ය භාණ්ඩ ද රැගෙන එම සේවකයින් අදාළ නිවසට ගොස් ඇති බවයි වාර්තා වන්නේ.
එම අවස්ථාවේ දී දරුවන් විසින් පවසා ඇත්තේ මිනී පෙට්ටිය ඇතුළු අවමංගල්ය භාණ්ඩ නිවසට රැගෙන ආවේ කුමන හේතුවක් මත ද යන්නයි.
“උඹලා අම්මා මැරිලා ඒක නිසා තමයි පෙටිටියක් ගෙනාවේ” යනුවෙන් එහිදී අදාළ පුද්ගලයා පවසා තිබෙනවා.
මව මියගොස් නැති බවත් ඇය මුළුතැන්ගේ සිටින බවත් දරුවන් පැවසීමත් සමඟ මුදල් ගෙවා රැගෙන ආ මිනී පෙට්ටිය ද රැගෙන ආපසු යෑමට මල්ශාලා සේවකයින් සුදානම්ව තිබෙනවා.
එම අවස්ථාවේ දී අදාළ පුද්ගලයා සේවකයින්ට තර්ජනය කර ඇති අතර, එහිදී ඔවුන් විසින් මිනී පෙට්ටිය නිවස තුළ දමා පිටත්ව ගොස් ඇති බවයි වාර්තා වන්නේ.
පසුව දරුවන් විසින් මේ පිළිබඳව පොලිසියට දැනුම් දී ඇති අතර, බලංගොඩ පොලිසියේ නිලධාරීන් පිරිසක් එම නිවසට පැමිණ අදාළ මිනී පෙට්ටිය යළි රැගෙන යන ලෙසට මල්ශාලා සේවකයින්ට දැනුම් දී ඇති බව සඳහන්.
ඒ, සඳහා ගෙවූ රුපියල් හතලිස් දහසක මුදල මල්ශාලාවට පැමිණ රැගෙන යන ලෙසට ද අදාළ පුද්ලයාට පොලිසිය විසින් දැනුම් දී තිබෙනවා.
කෙසේ වෙතත් එම පුද්ගලයා මෙවැනි ක්රියාවක් සිදුකළේ කුමන කාරණාවක් මත ද යන්න පිළිබඳව පවසා නැහැ.
