දින 05කට පමණ පෙර මාතලේ නගරයට ගිය බාලවයස්කාර පිරිමි ළමයෙකු අතුරුදන් වී තිබෙනවා.
අප වාර්තාකරු පැවසුවේ මෙම දරුවා 16 හැවිරිදි වියෙහි පසුවන අයෙකු බවත් ඔහු මාතලේ – මුවන්දෙණිය, මුත්තෙට්ටුතැන්න ප්‍රදේශයේ පදිංචිකරුවෙකු බවයි.
පසුගිය 19 වැනි දින පෙරවරුවේ නගරයට යන බව පවසා සිය පුතු නිවසින් පිටව ගිය ද ඔහු යළිත් නිවසට පැමිණ නැහැ.
අතුරුදන් වූ දරුවාගේ මව වන 48 හැවිරිදි යූ.ජී. සුනේත්‍රා ජයරාණි මහත්මිය ඉල්ලා ඇත්තේ අතුරුදන් ව ඇති තම පුතු සොයාගැනීමට මහජනතාවට සහාය දක්වන ලෙසටයි.
සිද්ධිය සම්බන්ධයෙන් රත්තොට පොලිස් ස්ථානාධිපතිවරයාගෙන් දසත අප මේ පිළිබඳව විමසීමක් ද සිදු කළා.
පොලිස් ස්ථානාධිපතිවරයා පැවසුවේ සිද්ධිය සම්බන්ධයෙන් පුළුල් විමර්ශනයක් ආරම්භ කර ඇති අතර කරන ලද මූලික විමර්ශනවල දී හෙළි ව ඇත්තේ දරුවා මව සමග ආරවුලක් ඇති කරගැනීම හේතුවෙන් නිවසෙන් පිටව ගොස් ඇති බවටයි.
කෙසේවෙතත් මේ වන තෙක් දරුවා සිටින්නේ කොහේ දැයි යන්න පිළිබඳ ව තොරතුරක් ලැබී නැහැ.
මෙලෙස අතුරුදන් වී ඇත්තේ මාතලේ – මුවන්දෙනිය කනිෂ්ඨ විද්‍යාලයේ ඉගෙනුම ලබන එම්.ටී.ජී. රුවිෂාන් සංකල්ප දරුවා යි.
දරුවා රාත්‍රිය වන තෙක් නිවසට නොපැමිණීම නිසා දරුවාගේ මව විසින් රත්තොට පොලිස් ස්ථානයට පැමිණිල්ලක් කරනු ලැබුවා.
මෙම දරුවා නිවසින් කුඩය පමණක් රැගෙන පිටවන අයුරු අසල නිවසක ආරක්ෂිත කැමරාවක ද සටහන් වී ඇති බවයි දසත ප්‍රාදේශීය වාර්තාකරු පැවසුවේ.
අතුරුදන් වී ඇති තම පුතු පිළිබඳ යම් තොරතුරක් වෙතොත් 071-1647543 යන දුරකථන අංකයට හෝ ළඟම ඇති පොලිස් ස්ථානයකට දන්වන ලෙසට ද අතුරුදන් වූ දරුවාගේ මව මහජනතාවගෙන් ඉල්ලා සිටිනවා.
